|
PSİK'OZİŞİ NİŞANİ: P'ARANOYA
P’aranoya, oxokteri ar şurişi zabunoba ren. Generalurot ar psik’ozi yani nosiş zabunobaşi nişani ren. İrişen onç’eloni nişanepe muşi hezeyanepe ren. P’aranoyağepes, k’arta oras manz’ageri mutepeşi, namtini ink’raxi “yeçkindape”, edo xolo Merihurepe na a3’onenan ar grup’i “p’at’i” şk’elen itexdidenan yado hezeyani aqvenan. Paranoyaği k’oçik çkvalepek ti-muşişa uhak’k’oba ikips do noç’iraps yado icers. Sebebi muşi şeni genet’ik’uri do gomorgvaluri ren yado isimadinen. Goşogorapek, namtini genet’ik’uri st’ruk’t’ura na uğunan ar makvalişi t’k’ubepek artot na p’aranoya iqopernan varna çkar na var iqvernan mara çkvaneri genet’ik’uri st’ruk’t’ura na uğunan jur makvalişi t’k’ubepes am artoba dido ç’it’a na iz’iren o3’iraps. Çodinalek ar ç’eşidoni genet’ik’uri tesiri na renşi simadas mxuci meçaps. Majura k’ele gomorgvak na yeçkindinaps st’resepe, namtini ocağuri k’ont’akt’işi st’ilepe do skidalaşi tarzepekti p’aranoyaşi albatoba monz’inaps. Mara genet’ik’uri sebebepe var renna am tesirepeşi p’aranoya oğodinuş albatoba ç’it’a ren.
Goşogorapek, nana-baba mutepeşi p’aranoyaği na renanpek irişen mağali risk’işi grup’is na renan no3’iraps. P’aranoya, didopeten golaxtimeri 3’anapes do fuk’ara k’oçepes iz’iren. K’aixeşa goşogorapek, am şurişi zabunoba iseriozulaşi, emi zabunoba muşi emiti ti-muşişa p’at’inoba oğodinuşi simadape moinz’inaşi zabunik adamepe k’ala xolosoni ok’ont’akt’uşen na imt’en do amukti em zabuni so3iaşen na get’k’omers oxo3’onapaps. P’aranoya, xvala iz’iraşi eşo dido texlik’oni var iqven. Mara umosi texlik’oni ar xalişi yani p’aranoiduri şizofreniaşi ar nişaniş albatoba na aqven ugonç’k’ondinu dvaç’irs. P’at’inoba bz’iraminon yado osimaduk namtini orapes p’at’inoba oğodinuşi dolingonu varna ti-muşis na omç’un xali k’ala obodunişi simada yeçkindinaps. Mesela adamepe şeni ti-muşi do çkvalepe radioşen na gamulun elek’t’rik’aşi sinyalepeten ç’opups yado na icers ar p’aranoyağik, nodgitinu muşi vazife ren yado asimaden do ak'sionişa gyaç’k’en. Mara mtini ar texlik’eşi albatoba dido ç’it’a ren, muşenido zabunik dido panik’i do şkuroni na ren şeni tehdidepe muşi arxvala otku k’onari ren.
Zabunis dido k’ap’et’i halusina3iape az’iren do na var ren xonarepe aşignen. Normaluri oğodapes, tesadufepes, çkvalepeşi ak'sionepes, ti-muşişen unormaluri oxo3’onapape meçaps. Quci muşiten na ognaps ğarğalape ti-muşi şeni ren do ayati mteli k’oçik muşi şeni na ok’oxterenanşi delili ren yado aceren. Sokağepes, tesadufiten artikartis na nungaps k’oçepe z’irasna oxosarnan yado gya3’onen. Çodinalurot, p’aranoyaği k’oçi generalurot mşkurnace, dudi muşi oxokteri do şumeri iqven. Xoloti nosişi zabunobape k’onari, osimadu do majura ç’k’uaneri ak’t’ivit’epes eşo dido mutu var ok’uixven. Meç’iroba do uhak’k’oba meç’aruşi simada, nosiş ont’alus, epilepsis do amfetamini steri ç’amepe oşumusti iz’iren. Ç’ami oxmarinuten yeçkindaşi zabunoba var naqonen mara ç’amişi tesiri xuras rt’aşa zabunobati iz’iren.
P’aranoya serozuli ar zabunoba ren do oşvelu muşiti eşo perpu var ren. Mara nişanepe genaralurot yano oxoi3’onen. Ginz’e orapes zabuni şeni arxvala ok’ok’idinale, mezezi yeçkindinale ren yado isimadinen. Majura ak'sionepe do zmonape normaluri, ç’k’uaneri na iqven şeni çkar mitik nosişi zabunobaşen endişe var ikips. Mtini tkvalaten k’ronik’uri ar xali na ren p’aranoiduri şizofrenia, generalurot psik’ot’rop’uri ç’amepeten işvelen. Zabunepeşi naotxalik ç’amişi şvelaten do psik’ot’erap’i k’ala nak’otxani ndğaşk’ule ik’aen. Mara p’aranoyağişi nişanepe gondunasnati zabunis mteloras medi3ialuri k’ont’roli dvaç’irs.
|
TÜRKÇE
