|
"80 3'ANERİ KURDURİ P'OLİT'İK'A UGECGİNERİ REN"
Na3ionaluri Muxbirobaş Organiza3iaşi Mcveşi Musteşariş Manuşvale Cevat Oneşik, PKK do Kurdepeşi p’roblema şeni, andğaşakis na ip’rat’ik’u p’olit’ik’ape ucgineri iqu ya tku. Ankaras na i3’opxinu do Kurdepeşi p’roblema na iğarğalinu “Turkiak mo3’qva muşi gorups” coxoni k’onferansişa ok’atuten na im3’k’ilu Oneşik, ağani p’olit’ik’ape omralu domaç’irnan ya tku.
41 3’ana MİTis na ixandu do 1989 3’anas Diyarbakirişi T’erit’orialuri Dudmaxvencoba na qu Cevat Oneşişi oxo3’onapape, t’erori k’ala ok’ok’idinu do na ip’rat’ik’en p’olit’ik’apeşi speros ist’oriuli ar k’rit’ik’i oxvenu tkvala ren. Cevat Oneşik, “Coxo muşis Kurdepeşi p’robleme varna Omjore yulvaşi p’roblema itkvas, mu na itkvasna itkvas. Ar p’roblema miğunan do var maçodinenan. Edo 80 3’aneri ar p’roblema miğunan do int’erna3ionaluri iqverenna, am p’roblemaşa var gemacginerenan do andğaşakis na ip’rat’ik’u p’olit’ik’ape ucgineri iqveren. Am xalis ağani p’olit’ik’ape var domaç’irnan yado var matkvenan” yado ğarğalu.
Ok’ok’idinus na ğurun askerepeti, na iğurinen PKKşi milit’anepeti Turkiaş Resp’ublik’aşi dobadinamşinepe renan na tku Oneşik, ist’oriaşen dersi eç’opinu do k’rit’ik’i oxvenuten oşkendari ar nena o3’opxinuşi dvaç’irobas mxuci meçu. Oneşik, “Yani mağduri voret yado maana oxvenuten p’roblema oçodinuşi oxvamç’k’oba mevaşkvaten do 3’ori gza oz’iru şeni vixandaten” ya tku. Oneşik, “PKK, arxvala İrak’is na ren sum şilya milit’anişen 3’opxineri var ren, mxuci na meçapan ar xalk’i uqonun. 22 3’aneri ar ok’ok’idinuk nesilepe doktiru. Edo am adamepes andğa reyi meçamuşi hak’k’i aqves. PKKşi organiza3iak na itesirups huk’uk’uri do legaluri st’ruk’t’urape ren. Aşo ar mtinoba k’ala pskidurt. İrak’is na ren silaxoni k’oçepe mek’arbaşi PKKşi p’roblema var içoden” ya tku.
Mcveşi MİTiş Musteşarişi Manuşvale Oneşişi toliten, amuşk’uleni p’eriodis Kurdepesti dik’k’atoni oqopinu dvaç’irnan. Oneşik, “Çvi do z’iri yado gagnapa met’k’oçuten oçodinuşi menceli o3’iramu do am mencelik şekli na meçaps p’olit’ik’ape op’rat’ik’u, xalk’uri ononape k’ala oxen3ales artikarti oxo3’onu dvaç’irs. Etnik’uri element’epesti p’olit’ik’uri organiza3ia mutepeşi am etnik’uri p’rinsibiten otesisu, ‘ma Turkiaşi p’art’ia vore’ otku dvaç’irs. Xususurot, Kurdepes dik’k’ati oxvenu na dvaç’irnan tema aya ren. Kurdepes diap’ozit’ivi steri oqopinu uk’ors” yado ğarğalu. Cevat Oneşik, 3’oxleni orapes gazetapes na ç’aru st’at’iapesti, Kurdepeşi p’roblema demok’rasiaten içodinen do so3iak majurani minobaşa xaziri ren yado simadepes mxuci meçeret’u do turbani şeniti p’roblema oqopinuşen imendranen ya tkveret’u.
|
TÜRKÇE
