|
K'ANTXA İQVİLEN-İ?
Didopete Xopa do Xopaşi xolos na uğun oput'e do ç'it'anoğapes na skidun k'antxa “Vipera Kaznakovi / K'avk'asiaşi Engereği” va na çkva ar coxoten xolo Xopaşi Engereğiti na itkven am dido mskvanoboni 3'i3'ilaşi ç'eşidik kianaşen kaizdinuşi şaraş doloxe ren.
K'antxapek, doyinamuten kamuinz'inenan, t'k'ebi mutepeşişi peri uça do k'vint'eli, namtinipesti k'aveşperi do k'vint'eli ren. Ğur3ulepe muşi eşo k'ap'et'işi do ginz’enoba mutepeşiti maksimumi 80 cm ren. Mt’k’alepuna svalepeşi kvaepuna raionepes skidurnan do larde muşi mağali na ren svalepe qoropan. Mağaloba muşi 2000 met’ro k’onari na ren svalepesti iz’irenan do xvat’ononi 3xovarepe na ç’k’omupan şeni dido faidoni renan.
Xolos orapeşakis eşo laboratuvarepes mç'ipaşaşi menda3'k'edimu şeni Avrop'aşi dido dobadonepes omt'ines mara uk'açxe hukumetişi k'anonepe k'ala ekologiuri genositişen kamuişletines, uk'açxeti çaişi ziraatis na goyiçku dğaşen doni p'at'işi sakvaris kae3'ales. Çaepes na ixmaren azot’işi mgvana k'ala dixapeşi ekologiuri n3ok k'arta ndğas m3ika m3ika kak'uixven. K'antxapek na imxors 3xovarepeşi ekologiati kak'uixven. Arçkvati oput'ari koçepeşi p'at'işi do ugagnoni p'aşurapeşen va muiçites. “K'antxa z'iraşi şka nut'axi”, “K'antxak k'oçis ncaşen no3xont'un”, “K'antxak k'oçis k'et'i istomers” steri ugagnoni do va 3'ori ocerupe na uğun oput'arepekti k'antxape qvilupan.
|
TÜRKÇE
