DUDBUT'K'A

XAZRET'İ İSAŞİ NENAK ARXVALA AM OPUT'ES İĞARĞALEN

Damask’işa 56 k’ilomet’ro mendranobas, na golinsvarun germapeş ok’obğalapete kvaepunapeş jin na kogeidgineren int’eresoni ar oput’e ren Malula. Germaş dudis na eşinç’en ar kvat’aşi oqopineri k’ademurot na kogeidgineren oxorepe muşik, namtinis ar didğormaşi doloxendo noqups; namtinisti ar oxorişi oşkendaşen dido didi ar kvak galendo muşi şka eşimers.

Ar oxorişi ç’erik, manz’agere ar oxori şeni balk’onurot ixmaren. Oxori mutepeşite Mardiniti oşinapaps Malulak. Mara am sva int’eresanurot na 3’opxups 3’k’ortoliş çkvaneroba muşik oxorxvenapa muşi var do; Xazret’i İsak na ğarğalapt’u nena na rt’u Aramurik dğaşskidalas arxvala Malulas na iğarğalinenşi oqopinoba ren.

Aramepek, Xazret’i İsaş 3’oxle 2000 3’anaşi çodinaş gverdişgverdis Suriaşi saxras na skideret’u, uk’açxeti Basraşi Korfezişen Amanosişi germapeşakis na nibargeret’es dido mcveşi ar pski ren. Ak’onari dido mçire geografias na nibargeret’es şeniti Samiş nenaş k’eraşi na uğut’es nanaşnena mutepeşi dido ginz’e orapes iğarğalineren, dido dialekt’epeşa ok’uirteren do orapeşi doloxeti oç’k’ondunişi ğuraşmedginobas kae3’aleren. İbranişi nenas dido xolosoni cumaloba na uğun Aramuri nenate na iç’arineren kart’alepes; Grek’ias, Egvipt’is, Anatolias, Surias, Jilentuna Mezop’ot’amias, İranis, Afganist’anis do Pak’ist’ani şakis dido sotxanepes ok’igagen.

Suryanuriti Aramiş nenaş tudeloni dialekt’epeşen ren. K’umranişi noç’arepe do İbranuri na ren Mcveşi Ahidişi namtini burmepek, am nenaşi Palestiniş Aramuri na itkven dialekt’ite kaiç’arineren. Xolo mengapurot, Mattaş İncilişi 3’k’ortoliti Aramuri ren. Xazret’i İsaşi nanaşnena muşiti, Taberiye do Nasiraş gomorgvas na iğarğalet’u do Galileş Aramuri na izop’inet’u dialekt’i rt’u ya itkvalen. An ant’ik’uri nenak oraş doloxe oç’k’ondinuşi ğuraşmedginobas na e3’alu şeni Malulas dido k’ap’et’işi ğirsi aqveren. Oskedinu şeni oçvaluş p’rogramas na amaiqoneren am oput’es nenaşi 3’opulape koguin3’k’eren. Malula, Suriaşa na i3’opxinen turist’ik’uri goxtimupes mok’itxuşi list’epes amiqonerenan, eşoki Mel Gibsonik maktaloba muşi na qveret’u “Tutku: qoropal mek’iroba” coxoni filmis osterapu şeni Malulaşen Aramuri na uçkinanpek kogamicoxineren.



                                                                                                                                                              TÜRKÇE