DUDBUT'K'A

TURKİAS AVROP'AŞİ İMAJİ KOK'UİXVU!

Englanduri t’elevizioniş inst’it’ut’i BBCk go3’oncğoneroba na qu ar int’erna3ionaluri goşogoraşi toliten, Turkiaş Avrop’aş Artonobaşi (AA) imaji na ok’uixvu oxui3’onu. BBCş Turkuli int’ernetiş sait’is na gidvinu goşogoraşi toliten, Turkialurepeşi gverdişen didopek İrani, Rusia, AOO do İsraelis negat’ivurot o3’k’ernan.

Ambaris, 3’anağaniş tutasti mengaperi ar ank’et’a na ixvenu goişinapinen do jur ank’et’aşi çodinalepes o3’k’omiluten Turkias AA şeni negat’ivuri na isimadups k’oçepes na manz’inu oxui3’onapinen. Ank’et’aş çodinalepeş toliten, AA şeni mak’aturepeşi didopek simada mutepeşi var tku do p’ozit’ivuri na izmonan k’oçepeşi nisp’et’i oşis 30, negat’ivuri na izmonan k’oçepeşi nisp’et’iti oşis 32 iqu. 3’anağanişi tutas na ixvenu ank’et’as p’ozit’ivuri na isimadepan k’oçepeşi nisp’et’i oşis 40, negat’ivuri na isimadepan k’oçepeşi nisp’et’iti oşis 16 oqopinot na gamaxteret’u goişinapu.

Ambaris, Turkias Englandi şeni negat’ivuri na izmonan k’oçepeşi nisp’et’i oşis 41 şen oşis 54 şa na yextu, Fransia şeni negat’ivuri k’oment’ari arxvala Turkialurepeşen na ixvenu itkvinu. Xolo ank’et’as na ak’atu Turkialurepeşi oşişen 69 ik, AOOs na uğun mencelişen şikaet’i na ikips, ank’et’a na ixvenu 27 tereşi oşkendas Turkia k’ala artneri simada na uğun 19 tere na ren do Grek’ia, Germania steri AA şi terepes AOO şeni negat’ivuri isimadups k’oçepe Turkiaşen dido na ren izop’inu.

Ank’et’as Turkias, İrani şeniti negat’ivuri ar imaji na manz’inen, ank’et’aşa na ak’atu Turkialurepeşi oşis 46 k’onaris, 3’oxleni ank’et’aşen 13 point’oni ar monz’inaten İrani şeni negat’ivuri simada na uğunan itkvinu. Turkias xolo, İsraelişa negat’ivuri point’i na meçespeşi nisp’et’i oşis 76, Rusia şeni negat’ivuri simada na uğunanpeşi nisp’et’i oşis 49 na ren oxui3’onu.

Globalscani do Pipaşk’elen 3’ilva 2006- 3’anağani 2007 tariğepeş oşkendas na ixvenu ank’et’as, kianas irişen negat’ivuri t’esiri ma uğun terepe İrani, İsraeli do AOO ren yado oxui3’oneret’u. K’anada, AA, Fransia do Jap’oniati irişen p’ozit’ivuri t’esiri na uğun terepe ren yado itkvineret’u. Ank’et’a na ik’oment’aru Marylandişi Universit’et’iş İnt’erna3ionaluri P’olit’ik’aş Ak’sionepeşi P’rogramiş Direkt’ori Steven Kullik, askeruli menceli na unonan terepek kianas negat’ivuri t’esiri oğodapan yado simada muşi ognaperet’u.



                                                                                                                                                              TÜRKÇE