|
ABXAZİA İXEN3ALİNEN!
Abxaziaş P’rezident’i Sergey Bagapşik, Abxaziaş Resp’ublik’aşi minobaş k’artepe yani p’asp’ort’epe dobadonaşi xalk’iş manişa meçit yado geçinadu. P’asp’ort’iş meçamuşi p’eriodi na var mo3’ondu Bagapşik, am 3’anaşi çodinas dobadonamşinepeşi oşis 90 k’onarişa ağani minobaşi k’artepe meçamu mevoğirapt yado oxo3’onapu. Abxaziaş Emniet’işi K’onseiş ok’oxtalas na ğarğalu Bagapşik, Abxaziaş minobaş k’arti niçinaş k’ule, dobadonaşi k’arta huk’uk’uri dulya ağani k’artepe k’ala na ixvenasunon goşinapu. Doloxendulyaşi Nazirobaş toliten, andğaşakis dobadonas na niçinu minobaşi k’artepe, didopeten Gagras oqopinot 53 şilya k’onari iqu.
Abxazia, mtinot (de facto) çkvaneri resp’ublik’a, huk’uk’urot (de jure) avt’onomiuri resp’ublik’a ren. 1990 3’anapeşi gyoç’k’alas na iqu limaş k’ule ti-moşletinoba muşi ognapinu mara andğaşakis çkar tereşk’elen var içinu. Abxazia mtinot do mtelot Okorturaşen ok’o3’k’eri ren mara Avrop’aşi Artoba, Amerik’aşi Ok’ont’aleri Oxen3alepe, Ok’oxtaleri Na3iape, Avrop’aşi Emniet’i do Oşkendarobaş Teşkilat’i, Avrop’aşi Artobaş K’onsei steri int’erna3iaonaluri organiza3iapek Abxazia, Okorturaşi ar t’erit’oria oqopinot içinopan do am p’roblema jur k’eleşi mo3’qvaluri met’odepeten oçodinapu unonan. Eşo ren tina, Abxaziaşi xalk’ik didopeten (% 97,7) Abxazia oxoşkveri ar oxen3ale oqopinot k’abuli ikips. 1992-93 3’anapes na iqu Abxazi-Kortu ti-moşletinobaş limaşi sebebiten Ok’orturaşen na ok’ui3’k’u Abxaziaşi xalk’is, 1993 3’anaşen 3’oxleni avt’onomiuri st’at’uşa uk’uniktu var unon.
Abxazia, Uçazoğaşi yulvaluri zoğap’ici k’ala K’avk’asiaş germapeşi oşkendas golaz’in. Jilentuna muşis Rusiaş Federa3ia, 3’alentuna muşisti Okortura ren. Dixaşzima muşi 8.600 k’ilomet’rok’are na ren Abxazias, 240 k’ilomet’roni zoğap’ici uğun. Dido xampa ar et’nik’uri st’rukt’ura na uğun Abxazias; Abxazi, Kortu, Rusi, Margali, Somexi, Turki, Ebraeli, Şoni xalk’epe skidun. 1992 3’anaşi limaş 3’oxle 535 şilya na uğut’u nak’onoba muşi, limaş k’ule 390 şilyaşa dvark’ineri ren. Ofi3ialuri nena muşi Abxazuri do Rusuli, dudnoğa muşi Suxum na ren Abxaziaşi majura noğape antepe ren; Gagra, Gudauta, Oçamçira, Tkvarçal, Gal. Gverdi tropik’aluri yani mapxapes tu3a do t’enoni, qinorapes çuçuna do mç’imoni ar k’limat’i na uğun Abxaziaşi ek’onomia; t’urizmi, agronomia (narencie, çai, txiri, tutumi, lazut’i, zemzevat’i, xili) 3xovaroba, meçxomeloba, memadenoba, mamt’k’aloba, subuka indust’riaşa mek’ireli ren. 3’alonas zoğaşi, dixaşi, n3aşi do k’inaşi gzaşmosa uğun.
|
TÜRKÇE
