|
TURKİAŞİ MAARTANİ AVT'OMOBİLİ: "DEVRİM"
Turkias na imralinu maartani svaloni avt’omobili, “Anadoli” var “Devrimi” (“Gektala”) ren. Andğaneri ndğas, mitis var uçkin am m3xade. Em p’eriodişi P’rezident’i Cemal Gurselişi simadaten, 16 Mbuloba 1961-s, ar avt’omobiluri t’ip’i mordinuşi misia (TCDD) Turkiaş Resp’ublik’aşi Oxen3aluri Rk’inaşgzalepeşi İnst’it’ut’is niçinu. Xolo em p’eriodişi p’olit’ik’uri şart’epe, burok’rat’uri ğoberepe, şaxsuri k’abğape do ar k’eleni simadape seriozuli ar ğoberi rt’u. Am avt’omobili 29 Gimua 1961 tariğişakis ixvenas yadoti giçinaderet’u. Am dulyaşi butçe rt’u 1.400.000 lira. 1894-s o3’k’omila do revizionişi at’elye oqopinot na ik’idinu do 1924-sti Eskişehirişi rk’inaşgzaşi fabrik’a coxo na gidvinu binas, Emin Bozoğluşi dudmaxvencobaten nanç’inerot eçi şuroni incinerişi ar k’erk’elik astaxolo oxandus kogyoç’k’u.
Mtel Turkias, universit’et’epeşen p’resaşa, maindust’reşen map’olit’ik’eşakis xonari muşi na ognapapt’u irixolo, Turkias mot’oriti, avt’omobiliti na axvenasunonşi simadas oceru var unt’u. Mara, 29 Gimua 1961 ç’umanis, Turkias na ixvenu maartani am avt’omobili, xolo Turkias na ixvenu maartani mot’orişi menceliten Turkiaş Na3iaşi Didi Meclisiş binaş 3’oxleşa muiğinu. P’rezident’i Cemal Gurselişa itakdiminu. “Devrimi”, na giçinaderet’u tariğis, Hipodromis na ixvenu 3eromaniaşa ak’atu.
Çkvadoçkva gagnapapeten 27 Pukrik’aş darbeşi simboli oqopinot iz’irinu do i3’irinu “Devrimi”. Coxo muşi guiç’k’ondinapu. Andğaneri ndğas “Devrimi” nirçinen (Tulomsaş) Turkiaşi Lok’omot’ifi do Mot’oriş İndust’riaş firmaşi muzeumis. Modeli “Devrimi”şi t’ek’nik’uri çkinape aşo ren;
Omralaşi tariği: 1961
Monk’anoba: 1.250 kg
Ginz’enoba: 4.500 mm
Mçirenoba: 1.800 mm
Mağaloba: 1.550 mm
Omralaşi sva: Eskişehirişi Rk’inaşgzaşi Fabrik’a
Omralaşi ora: 4 do gverdi tuta
Omralaşi nak’onoba: 4 3’ali gexeduşi avt’omobili
10 3’ali mot’ori: 4 3’ali A4L-şi t’ip’i, 3 3’ali A4T-şi t’ip’i, 3 3’ali B3T-şi t’ip’i
7 3’ali şanzumani: 3 3’ali A-şi t’ip’i, 4 3’ali B-şi t’ip’i
3ilindrişi nak’onoba: 4
3ilindrişi çapi: 81 mm
3ilindrişi hacmi: 20 70 cm
Stroki: 100 mm
K’ompre3ia: 6,8: 1
Menceli: 50 Hp
Oktoba: 3.600 d/d
K’arak’t’erist’ikoba: Otxo oraloni
|
TÜRKÇE
