|
LELAŞİ AĞANİ ALBUMİ KOGAMAXTU
Sup'ermuru3xi Lela 3'ur3'umiaşi ağani albumi Okorturas kogamaxtu. Albumis aşi Lazuri, ar Margaluri do ar Turkuli birapa uğun. Turketuri masiminalepek ''Ç'ut'a Ç'ani'' birapate Lela 3'ur3'umia içines. Dido k’ai a3'ones Lela 3'ur3'umiaşi xonari do Lazuri obiruşi st'ilepe muşi. Lelaşi Lazuri obiru çkvaneri ren, dudi muşişi 3'opxu do eşo muşeburot. Oxuink'anoni, qalişen doloqurobatoni, gurişi meç'irobatoni, uxonorobatoni muç'o eşo zuğaşp'iciş xolos na gulun varna xolo eşo uxonorobatoni talğapeş jin na inçvirs zuğauçaşi qvinçepe steri, çkva do çkva mskva obiruşi st'ilepe na uğun Lela 3'ur3'umiaşi musik'aşi albumi mundes masiminasenan yado xeleba miğunan.
Lela 1969 3’anas Tbilisis dibadu. 1975-1986 3’anapes Tbilisis ik’itxu. K’aixeşa na ibirt’u do obiru dido na onç’elt’u şeni k’onserivat’uarişa amaxtu. Uk’açxe, Şota Rustaveliş Tiat’riş İnst’it’ut’işi, musik’aş do art’ist’iş spe3ialobaşi burme oçodinu .
Maartani albumi muşi 1999 3’anas gamaxtu. Emuşk’ule Lelak dido fest’ivalepes ak’atu do 15 k’onari p’rizepeşi manceti diqu. Edo Germania, İsraeli do Rusetis dido k’onserepe meçu. Kimoli muşi na ren K’axa Mamulaşvilik, menejeroba muşi uxvenups. Lelas, Mariami coxoni ar k’ulani bere uqonun.
|
TÜRKÇE
