|
İMP'ERİALİZMAŞİ MTİNİ NUNK'U: "HİROŞİMA DO NAGASAKİ"
Hitleruli Germaniak at’omişi bombi qvasunt’u yado na isimadept’u Amerik’aşi Ok’ont’aleri Oxen3ale do Brit’aniaşi Omapobak, am şkurnaten “Manhattanişi P’roget’i” coxo na gyodveret’es at’omişi bombiş p’roget’is kogyoç’k’es Majurani Kianuri Limaş oras. Germania limas gicgineret’u do megabre muşi Jap’onias at’omuri bombi oxvenuşi albatoba çkar var uğut’u tina, am oxandupe naqonu.
6 Mariaşina 1945 ndğas, ç’umani 8:15-s “Little Boy” (“Ç’it’a Bere”) coxoni iptineri nuk’leeri bombi, “Enola Gay” coxoni B-29 Superfortressuri oputxaleşen istolinu. 10.000 met’ro mağalobaşen na istolinu bombi Hiroşimaşi 580 met’ro jin t’k’va3u. İptineri moment’is 70.000 şuri konişiru. Mağali t'u3anobaşi sebebiten, k’oçepe asfalt’işa nin3axes. Ar dolonişi morgvalis, asit’i mç’imu. Jur tutaş doloxe, radia3iaşi sebebiten 70.000 adami çkva doğuru. 60.000 adamiti xut 3’anaş p’eriodişi doloxe doğuru. Maartani xut 3’anas doğuru 200.000 adami. Vitşilyapeten adamiti isak’at’u. Xrist’ana 1945-s, Hiroşimas na ren ofi3ialuri odudepek, iptineri moment’is na ğurespeşi nak’onoba 140.000 oqopinot na isimadept’es ognapes. Bombişi oğodobaten şilyapeten adami çkva tamo tamo doğuru. Hiroşimaşi k’ore3xala aşo rt’u.
9 Mariaşina 1945 ç’umanis, saat’i 11.02-s “Bockscar” coxoni B-29 Superfortessuri oputxale, “Fat Man” (“Mgvaneri K’oçi”) coxoni majurani nuk’leeri bombiten noğa Kokuraşa nunç’işu. Mara Kokura rt’u motrageri mpulapeşk’elen. Oz’iramuşi mendranoba dobağine va rt’u. P’at’i t’aroni do majura p’roblemapeşi sebebiten, putxalaşi k’erk’elik majura noğira mutepeşi na rt’u Nagasakişa oxtimu şeni guiktu. Akonaşi rt’u Jap’oniaşi beciti indust’riauli t’erit’oria. Bombişi sebebiten astaxolo na ğurespeşi nak’onoba 100.000 na rt’u isimadinen. Radia3iaşi sebebiten dixa do 3’k’arepeşi oğurz’ulu do umosi ginz’e p’eriodis zararepe var izmonas nati, maartani xut 3’anas Hiroşima do Nagasakis 350.000 şen met’i 3ivili doğuru.
Bombişi ot’k’oçinu k’ala, Hiroşima do Nagasaki ar momemt’is nik’arbu. At’omişi bombik na yoçkindu şok’uri soloğanepe iqves, şilyapeten adamiş oğuruşi sebebi dido mçire ar speros. Soloğanepe na var nanç’işinu svalepes na doligzu radia3iak iqu dido adamiş oğuruşi sebebi ok’uleni ndğalepe, tutape do 3’anapeşi morgvalis. Na var ğurespe “Hibakusha” yado icoxinu. Hibakushape do mutepeşi berepe gamik’atinu majura k’oçepeşk’elen dobadona mutepeşis.
Hiroşima do Nagasaki ugoç’k’ondu do ugoç’k’ondinu andğati ant’i-imp’erialist’uri ar k’oçinobaş dulya ren.
|
TÜRKÇE
