|
NA3İONALURİ CASUSİ: İNGLİSİ KEMALİ
İnglisi Kemali z’egneten na içinen Ahmet Esat Tomruki rt’u na3ionaluri ok’vak’idinuşi guramepeşen ar teri na işinen ar casusi. 1887-s, Cerrahpaşaşi Altimermer coxoni semt’is dibadu. Baba muşi rt’u Pondepeş Nazirobaşi Mogapapeş K’alemişi Direkt’ori na rt’u Mehmet Reşit Begi. Nana muşiti Sidika Xanumi. Gurami, umaşkurinace do menceloni ar bere rt’u. Galatasarayişi Sultanis ik’itxu. N3’opulas ik’itxupt’uşi, hobi oqopinot, k’artp’ostalepe inç’elinu. Am sebebiten post’axanaşa ulur-mulurt’u udodginu. Hafiyepek 16 3’aneri Esati ç’operenan. Jonturkepeşi k’erk’eleşen ren yado şkence uxvenerenan. Cumadi muşik Esati dobadonaşen omt’inapu şeni ar Yahudi k’ala ok’oitkveren. Emus geç’areli meçeren. Yahudik t’k’obaşa Esati k’aravişa gyoxuneren. Mara k’ap’t’anik ç’operen Esati. Geç’areli var uğut’eren. Esati rt’eren mt’ineri. K’ap’t’anik gyo3’k’ederen Esatis ar babaşi gagnapaten. Ok’uleti skiri dixveneren eya ti-muşişa. Esati irderen İnglisi steri. Navişi K’olejis ik’itxeren do dip’loma aqveren emus. Salonuri k’aidepeti igureren. N3’opulas ik’ipxupt’uşi, p’rofe3ionalurot boksi qveren. Didopeten maartanobape aqveren emus.
Maartani Kianaşi Ok’ok’idinu geç’k’uşi, Mp’olişa guikteren. Matopeşi leit’enant’i malimobaşa izdineren. Maittihatepeşi ambari ezdimuşi organiza3ia na rt’u Teşkilati Mahsusaşati amaxteren. Çanakkaleşi front’is, çinoberi İnglisi casusi Lavrensis noxosareren. Kutulammare coxoni zonas na iç’opinu İnglisi Generali Tovshendi k’ala arto molixuneren. Aşopete muşi p’icişen mutxanepe ognu şeni gza goreren. Xe gedvineri Mp’olis, ora muşi xarceren Beyoğlus na geladgin boksişi k’lubis. Akonaşi Kemal Begofişi rt’eren. Raxat’i var dodgiteren. İç’opineren do xap’isxanas molixuneren. Xapisxanas içineren Koçaki coxoni Urumi. Koçaki rt’eren çinoberi ar maxire. Koçakişen igureren maxirobaşi xeşnoxvene. Am xeşnoxvenek ti-muşi moşletineren casusobaşi skidalas. Xe gedvineri Mp’olis, maişgaluri mencelepeşi boksişi şamp’ioni ocginuten didi çineroba aqveren.
Emuşk’ule Anatoliaşa imt’eren. 3’oxleneri p’eriodepes, Na3ionaluri Mancenaleşi geçinaduten mt’erişi oşkendas ixanderen. Z’egne “İnglisi Kemali”, Balikesirişi Xegedvuşa Ek’akta Na3ionaluri Mancenaleş K’erk’elişi Oktalaş K’omisiaşk’elen na gidvinu itkven. Didi Meclisi guin3’k’uşi, Ank’araşa ideren. Mustafa Kemali, Fevzi do İsmet Paşape muik’itxeren. Gazi Mustafa Kemal Paşaşi geçinaduten, İnglisuri, Fransuli, İt’alianuri do Urumuri nenape na uçkit’u şeni, Generaluri Şt’abişi Dudmaxvencobaşa mek’ireli oqopinot, Ambari Ezdimuşi Burme şeni oxanduşa gyoç’k’eren. Misiaten İzmirişa içkvineren. Berz’enuli Armiaşi Sardali Papulasişen int’erviuti ezderen. Amerik’aşi Ok’ont’aleri Oxen3aleşen ar jurnalist’işi minobaten na k’orobu ğirsoni informa3iape ekolen Ank’araşa noncğoneren. Ar ndğas, ot’elis, Ç’erk’ez Ethemişi k’oçepeşk’elen içineren. Maişgale Berz’enişi Mancenaleşa ambari muşi niçineren. İç’opineren. İk’itxineren. Casusi na rt’u çkar p’ot’e k’abuli var qveren. Xut 3’anaşi ceza niçineren molaxunerot. İzmiri, Atina do Paleovastratosişi hapisxanapes molaxuneri skideren. Mç’ipe ç’k’ua do na qu megabrobapeşi şvelaten 14 tutaş k’ule imt’eren. Maxiroba muşişi şvelaten şuroni dodgiteren. Avant’iurapeten opşeri ar magzalobaş k’ule İzmirişa guikteren. Am faras, Ank’arak Gyulva T’rak’iaşa mendiçkvineren. Em oras, Berz’eniş Armiaşi geçinaduten na ixandept’u Somexi Generali Antranikişi k’arargaxişa amaxteren. Na3ionaluri Ti-moşletinobaşi Limaş morgvalis na ixandu ambari ezdimuşi dulyapeşi moment’is İt’aliaşi dobadonamşine Celepi, Trablusgarpuri Abdullah Paşazade Mahmut Saiti do Amerik’anuri avt’ori Harry Villyişi minobape na ixmaru, itkvinen.
Ahmet Esat Tomruk 1932 3’anaşakis, subuki monk’anobaş boksişi şamp’ioni rt’u. K’ap’et’i mcixepe muşişi sebebiten, gvari “Tomruk” yado ezderen. Majurani Kianaşi Limaşi moment’is, Balk’ani ve Avrop’aşi dobadonapes casusoba qvas yado misiaşa icoxineren xolo. 1919-s Araburi çolepes na gyoç’k’eren k’arieri muşis 1950-epeşi çodinas na iskedinu K’ibrisişi p’roblemaşakis naqoneren. “Qini Lima”şi 3’anapes var dvaç’ireren Ahmet Esat Tomruki steri guramepe. K’umarxanepes na mogu geç’arelepe, ok’vak’idinu şeni xarceren. Oxen3aleşen geç’areli do k’arieri var goreren. Namtini orapes dansori namtini orapes boksior, namtini orapes şofori, namtini orapesti k’rup’ie oqopinot ixanderen. Kianaşi otxo k’elesti goxteren. Şilyadoar nunk’oni Ahmet Esat Tomruki, çodinuri 3’anapes umanceloni rt’eren. Ugeç’areloni doskideren. Umutelobaşi doloxe rt’eren. Dido ginz’e 3’anapeş k’ule, 26 Mbuloba 1964-s, 487 k’ore3xaloni k’anoniten, Turkiaş Na3iaşi Didi Meclisişk’elen dobadonaşa oxizmet’uşi ge3’opxaşen 500 Lira xeşpaxa ti-muşişa k’arta tutas niçineren. Avant’iurapeten opşeri ar skidala na skideren Ahmet Esat Tomruk 14 K’undura 1966-s şuri muşi Ğormotis meçeren. Sapule muşi Çankiris ren.
|
TÜRKÇE
