|
ÇKVANERİ AR MSKVANOBA: PARPALİ
Parpali ren “Lepidoptera” familiaşen. Nanç’inerot 150.000 sort’i muşi skidun yado içkinen. Xura muşi çkvadoçkva mskva perepeşi ker3elaten motvaleri ren. Ker3elapeşi k’un3’ulepe mçire puzurepe ren. Gagnapuri renan. Arm3ika k’ank’alatenti mestun. K’arta sort’i parpalis uğun çkvaneri msvaşi didiloba. Namtini sort’epes var uğunan msvape. Namtini sort’epeşi 3’unapesti var uğunan svape. P’icepe mutepeşi ren ma3’u3’onale. P’icişi burmepe renan xort’umi steri. Entepe var ixmart’aşi, xort’umi sp’irali steri k’irk’olups dudi muşis tude. Parpalik nekt’ari 3’u3’onups. Pukirepeşi nekt’arepe, k’uçxepe muşiten ezdips. K’uçxepes uğun mordineri k’ont’roluri sist’ema. Unont’aşi dudi muşiş tude sp’irali steri na dgin k’irk’oleri xort’umepe muşi oginz’anups do 3’u3’onups.
P’icişi organi, xvalot pukirişi mt’veriten na skidun “micropterygidae”şi familias ren malağunoni xususobas. Ti-mutepeşi tomaloni ren. Xura muşis i3’k’edinaşi, jur didi toli na uğun iz’iren. Didopes uğun ç’ereloni toli. Namtini parpalepek seris do namtinepekti dğaleris putxunan. Serişi parpaliş xura ren mçxu do monk’a. Antepek putxunan gverdi m3’k’upi do seris. Mç’ipe na ren ant’enapeşi k’un3’uli ren m3’k’ili. Am sort’epeşi ant’enape renan o3xoci steri. Didopeten peri mutepeşi çxant’eri var ren. K’ap’ineri putxunan. Dğalerişi parpalik moişvacups seris. Mç’ipe ren. Muşi xura ren çorçi. Ant’enape muşişi k’un3’ulepe ren k’op’ali steri. Msvape muşi ren mskva. Çkvaneri peri do mot’ivepeten me3’opxeri ren. Tamo tamot putxun. Noxedaşi, msvape muşi jinşa emti okaçaps. Serişi parpalepek moişvacupt’aşi, msvape mutepeşi otraga steri okaçapan. Xura mutepeşis jin getvalupan. Namtini orapesti gon3’k’imerot okaçapan. Serişi parpaliş ognu do oz’iruşi gagnapa gagnapuri ren. Namtini sort’epeşi kimolepek naşurenan 5 k’ilomet’ro mendras na ren 3’unaşi şura. Dğaşi parpalişi ant’ena var ren gagnapuri.
Parpalik markvaliten imralen. Parpalişi markvali ren gverdi burti, burti, 3ilindri do nok’i steri iqven. 3’unak markvalepe arto varna mtelot ncaşi jin varna but’k’apeşi jin men3axuten naşkumers. Namtini 3’unapek markvali mutepeşi artikartişi jin men3axuten dudirape ikipan. Namtini 3’unapek markvalepeşi jin puzurepeten getvalupan. 3’una parpalik meç’k’vidups am puzurepe xura muşişen. Qinora na z’irasunon markvalepe, k’ap’et’i ar t’k’ebite motvaleri ren. Markvalişen na gamulun larvapes itkven munt’uri. Mtel qinora, markvaliş t’k’ebişi doloxe mordinuten skidun. Pukrinoras k’erk’eli muşi ot’axuten oç’k’omale ogoru şeni gamulun. 3’una parpalik markvalepe muşi naşkumers moxva mzgudape k’ala. Aşopeten munt’urepes aç’k’omenan raxat’obaten. Munt’urepes uğunan sum t’k’ubi toli do jurişen xutişa t’k’ubi korbaluri t’rik’i. P’icişi burmepe renan mak’ibinale do malağunale. Jileni çarbişa na mulun met’aksuri hormonuri mbelape renan. Didot na imxornan munt’urepek 4 varna 5 fara t’k’ebi iktirupan. Normaluri didinobas iqvaşi, met’aksuri hormoniten ti-muşişa k’oza şupan.
K’ozaşi doloxe, ağanmordale na iqvasunon pupaşi xalişa niktenan. Ok’uleti pupak t’k’ebi muşi xarups. K’ozaşen gamulun ağanmordale parpali. Murenki em oras var aputxen. Msvape muşis di3xiriten opşu dvaç’irs. Di3xirişi oxomu do omencelu şeni, nak’otxani saat’i golaxtimu dvaç’irs. Namtini parpalapeşi skidalaş ora 24 saat’i ren. Namtinepeşiti 1 varna 2 tuta ren. Skidala mutepeşi nak’otxani sezoni k’onari ginz’e na ren parpalepek qinoraşi nciraşa incirnan. Namtinepekti umosi t’u3a na renan t’erit’oriapeşa emigra3ia ikipan. Şilyapeten k’ilomet’roni gza, oputxuşi menceli uğunan entepes. İnglandis dido çinoberi na ren ar sort’ik qini iqvaşi, Oçildre Afrik’aşa emigra3ia ikips. Parpalepeşi emigra3ia ren ar k’eleni. Var uk’uniktenan. Xvala Amerik’as na skidun ar ç’eşidi emigra3ia ikips do xolo artneri sotxanişa guikten. Namtini parpalapeti ğurzuloni renan. Tamo tamot putxunan. Çxant’eri perepe uğunan. Am perepeten meçapan nişani mt’eri mutepeşişa. Edo bombolape na imxornan 3xovarepekti entepeşen imt’ernan.
|
TÜRKÇE
