DUDBUT'K'A

OKORTURAŞ 'OBOMBİNUŞİ' İDİAPE!

Okorturaşi Galendulyaş Nazirobak, “Okorturaşi n3aluri nodgituş sist’emak, Okorturaşi oxen3aleş sinorepe na mek’ilinu do Rusiaş Federa3iaşk’elen Okorturaşi n3aşa na amixtinu itespit’inu” yado ognapu. Ognapinus, Rusiaşen na yeputxu limaşi oputxale Okorturaşi n3aşa 5 k’ilomet’ro k’onari na amaxtu itkvinu. Rusiakti am idia m3udi ren ya tku.

Okorturak, 7 Mariaşinas na qu ognapinus, Rusiak n3a muşi golaxtimuten dudnoğa Tbilisişi nanç’inerot 65 k’ilomet’ro gyulvas na ren ar oput’eşa bombi na get’k’oçu mara bombik na var t’k’va3u idia qverert’u. Okorturaşi Doloxendulyaş Naziri Vano Merabişvilik, oputxale n3a mutepeşişa na mek’axtu radarepeşk’elen itespit’inu do 700 k’iloni bombi na it’k’oçinu svas 2 met’roni t’aponi intxoru ya tkvereet’u. Okorturaşi P’rezident’i Mixeil Saak’aşvilikti, “Çkini na3ia aşo çkar mitis var aşkurinapinen do var ak’oartinen” ya tkvereet’u do int’erna3ionaluri so3iak am oğodaşa seriozuli ar reak3ia meças yado mepşvent yado ognaperet’u. Rusiakti am idiape m3udi ren yado muivareet’u. Rusiaşi Tbilisiş Didelçi Vyaçeslav Kovalenkok, am oğoda Rusiaşk’elen ixvenu yado na var icers do Okorturaşi n3aşa mek’axtu yado idia na ixvenen oputxalepeşen Okorturasti na uğun oxo3’onaperet’u.

Okorturas Mixeil Saak’aşviliş 2003 3’anas “Vardişi gektala”ten xe3ala na aqveret’uşen doni Rusia do Okorturaşi k’ont’akt’obapes umeç’k’vidoni ar p’roblema uğun. Rusia, Okortura iroras otehdidu do mteloras otahakkumuten k’abaxat’i na meçaps Saak’aşvilik, Mosk’ovak p’roblemoni t’erit’oriape na ren 3’alentuna Osetia do Abxazias na omç’un sep’erat’ist’obapeşi oçodinuşa nodgitun yado idia ikips. Okorturak 3’alentuna Osetia do Abxazias na renan Rusi mo3’qvaşi mencelepek oxvenu na dvaç’irnanpe var ikipan yado t’erit’oriapeşen gamaxtan yado ok’vandinu ren jur tereş oşkendaşi k’ont’akt’obapeş onormaluşa na nodgitun irişen beciti fakt’ori. P’arlament’ik Rusi mo3’qvaşi mencelepe gamiçkvinas yado k’arari eç’opuşi Rusiaş p’arlament’işi tudeni k’omisia na ren Dumakti, Okorturaşa namtini ek’onomiuri ambargopeşi k’arari eç’opinuten mengaperi reak3ia meçu.

Okorturak 2006 Gimuaşi tutas casusoba qvesşi idiaten 4 Rusi ofi3eri moloxunuşa Rusiak dido k’ap’et’i reak3ia meçu do iptinerot Tbilisis na uqonun didelçi muşis ucoxu. Rusiak xolo, am oğodaşi sebebiten Okortura k’ala havaşi do dixaşigzaş nunç’işoba oqopinot k’arta post’a do k’ominik’a3iaşi xizmet’epe na oçodinu ognaperet’u. Jur tereşi oşkendas havaşgzaşi magzaloba ağanerot geçk’apinu şeni na ixvenu ğarğalapeşen andğaşakis p’ozit’iuri çkar mutu var moiginu do Rusiak, Okorturaşi dobadonamşinepeşa na meçapt’u viza om3ikanu.



                                                                                                                                                              TÜRKÇE