|
TİŞİ 3'K'UNİŞ ATAK'İ MİGRENİ
Migreni, didopeten atak’epe k’ala na yeçkindun tiş 3’k’unişi ar ç’eşidi ren. Şveleri na var ren sinuzit’işi zabunoba migrenişa nikten yado icerinen. Atak’epe 4 saat’işen 72 saat’işakis çkvaneri ginz’enobapes iqven. K’oçis atak’epeşi oşkendas ti-muşi mtelot normali iqven mara moxtasneri atak’işi endişe aqven. Mcveşi orapes “arxvala tiş 3’k’unişi ar ç’eşidi” oqopinot na i3’k’omilat’u migreni, originali ar norologiuri zabunoba ren yado k’abuli ixvenen.
Migrenişi 3’k’uni generalurot normali varna şiddetoni iqven do k’oçişi normaluri akt’ivit’epes nadgiten; hemi migreni na omç’un k’oçişi hemiti xolosoni k’oçepe muşişi skidalaş k’alit’e ok’oxvups. Migrenik normaluri skidalas notesiraps; oxandu, ocağuri skidala varna hobepes negat’ivuri tesiri oğodaps. Migreni oxorcalepes kimolepeşen umosi dido iz’iren; oxorcalepes % 18,6 do kimolepes % 6,5 nisp’et’is iz’iren. Na ixvenu goşogorapes ar hekimişk’elen teşhisi niçineri na var ren migrenişi zabuniş nisp’et’i zabuni oxorcalepes % 59 do zabuni kimolepes % 70 k’onari na iqven z’irineri ren.
Migreni namu sebebiten yeçkindun mtelot var içkinen. Migreni kunişi di3xiriş cerğvepe do elekt’rik’uri xuçeşi ik’azi na ognapaps kimialuri maddepes na ağoden ktirapapeşa mek’ireli ren yado isimadinen mara am ktirapapeş sebebi oqopinuşi temas goşogorapes xoloti niqoninen. Migrenişi mordinuş temauli genetik’aşen yeçkinduni yado k’aixeşa var içkinen. Xandapeşi toliten, egere nana do babaşen ar teris migreni omç’unna, beresti ağodinuşi albatoba ren % 40. Egere juris xolo migreni omç’unanna, beresti % 75 albatobaten migreni aqven. Migreni oğodinuşi temauli umosi dido ren, ar markvalişi t’k’ubepes jur markvalişi t’k’ubepeşen.
Migrenişi atak’epe tişi majura 3’k’unepeşen na goşo3xunups xususobape aşo ren: Oşkenduri şiddetis varna dido şiddetoni 3’k’uni, guriş oktu do ontxoruşi noqonu, te, xonari do namtini oras şura p’at’i o3’onu, ovaloni, nabizi steri, ar k’eleşen do oxonk’anuten na manz’inen 3’k’uni. Namtini k’oçepes migrenişi 3’k’unişen 3’oxle 10- 30 deik’e na naqonen auraşi p’eriodi aqven. Aurak çxant’eri teşi odvinupe, tirtineri, peroni ğarape, otole noktape varna ar k’elen oz’iramuş gondunu steri oz’iramoni ktirapape o3’iraps. Aurak xolo xanç’alepe varna t’rik’epes odimç’k’inu varna obuz’gu varna tişi oktuti a3’irapen. Auraşi sebebi xoloti var içkinen. Dido oxorcas omğiruşi oraş k’ule ostrojenişi hormoni dvark’inuk migrenişi 3’k’unişa gza nuçaps.
Andğaneri ndğas migrenis na nadgiten varna oşvelaps dido ç’ami koren. Dido atak’i na ağoden migrenişi zabunepe şeni hekimepek didopeten nodgitoni ç’amiş şvelape itercihapan. Şvelape hekimepek na tkveres steri ip’rat’ik’aşi atak’epeşi ora do şiddeti im3ikanen. Edo xolo migrenişi ç’amişen met’i şvelaşi met’odepeti ç’amoni şvelas omxvacinerot ixmarinen.
|
TÜRKÇE
