DUDBUT'K'A

FENERBAHÇE-ULKERSPORİS MUEPE İQVEN?

Ulkerspori do Fenerbahçeş ok’oxtimute na kageidginu Fenerbahçe-Ulkersporik finalişi p’eriodis Efes Pilseni 4-0 ocginute am ok’oxtinuşi geç’k’ala na rt’u 2006-2007 sezonis şamp’ioni iqu mara mu na iqu na amuş k’ule iqu. K’arta mutxani şamp’ioni ar t’akimiş ant’renori Aydis Orsis atxozinute kogyoç’k’u. Aydin Orsik t’akimiş dulya muşis kort’uşi Bogdan Tanyeviçik Slovenias Fenerbahçe-Ulkerspori şeni maostere ogorus kogyoç’k’eret’u.

Bogdan Tanyeviçik 2004 3’anaşen doni Turketiş Na3ionaluriş t’akimişi ant’renoroba ikips. Turketiş Na3ionaluriş t’akimi 2006 Kianaş Şamp’ionobaşi çodinas maanşani iqveret’u mara kianaş doloxe irişen mtini do menceloni t’urnuva na ren Avrop’aşi şamp’ionobas dido p’at’işi diragadu, ugecgine iqu 2005 do 2007 iş 3’anapes.

Sp’ort’işi doloxe p’olit’ik’a va ren, vana va iqvasunon ya itkvalen mtelixolo oras. Mara aya muç’oşi iqvasunon? Ar misali komepçatna, 1995 3’anas Yugoslaviak Avrop’aşi Bask’et’boliş şamp’ioni na iqveret’u oras, seramonias na moxtu Yugoslaviaş mtelixolo mabask’et’bolepek artot jur xeşi k’iti mutepeşite “Serbia, ma do gecginoba çkimi” oxo3’onapa na uğun “Çetnik”işi işmari noğireret’es t’ribunepes do k’amerapes. Bosniauri ar Sirbi na ren Bogdan Tanyeviçik; Stefanel Milano İt’aliaşi şamp’ioni, 1999 3’anaşi Avrop’aş Şamp’ionobasti İt’aliaş Na3ionalurişi t’akimiti Avrop’aş Şamp’ioni doqveret’u mara an3’ineri orapes ğirsi muşi doçodineri, 1999 3’anaşen doni so na ar t’akimi oktaluna ekonaşen na itxozinu, dido mcveşi do moda muşi na golaxtimeri ar sterape na osterapaps, sup’erit mabask’et’bolepe ink’raxi na uğun ar ant’roneri ya işinen bask’et’boliş p’ia3aşi doloxe. Tanyeviçiş t’ranferiş p’olit’ik’apeti dido ent’eresani iqven mtelixolo orapes do Fenerbahçe-Ulkersporisti xolo eşo iqu. Miti skanik na va içinopt’u 5 ağanmordale bere kayezdu t’akimi muşis do antepeşi sumik çkvaneri xalk’işi mabask’et’bolepe renan.

Fenerbahçe-Ulkersporis aşo gvak’vironi mutxanepe iqvet’uşi, Efes Pilsenik Avrop’aş şamp’ioni Rusiaş ant’roneri İsraeliş dobadonamşine Amerik’anuri na ren David Plati ant’renori muşi do3’opxu, otxo ağani çkvaneri xalk’işi mabask’et’bolepe muqonu do am mabask’et’bolepeşi sumik 3’oxleni 3’anapes NBAs na istert’es mabask’et’bolepe t’es. Efes Pilsenis antepeti va dubağu, jur 3’anaşen doni Esp’aniaşi Tau Ceramicas na istert’u, 2000-2005 3’anapeşi şkas Ulkersporis na istereret’u, muç’o eşo coxo muşi Ulkerspori k’ala simboli na iqveret’u Serkan Erdoğaniti kayezdu. An3’i do na moxtasunon 3’anapes, Fenerbahçe-Ulkserporik Efes Pilseni k’ala muç’oşi rek’abet’i na qvasunon albat irişen k’ai Bogdan Tanyeviçis uçkin!!!

Efes Pilseni do Ulkerspori juriti Turketişi mark’ape renan k’ap’it’alişi oqopineri. Efes Pilsenis; burjuvapeş do Amerik’anuri k’olejepeş t’akimişi şina uğun. Ulkersporik; xalk’urişi do Anatoliaşi şuri osimbolops. Mara andğalepes Ulkersporişi am şina mek’arbinu şeni xe mutepeşişen na muxtepan irixolo ondi ikipan.



                                                                                                                                                              TÜRKÇE