DUDBUT'K'A

AVNİ MEMEDOĞLU, SURATİŞİ MERÇAPA MUŞİTEN MOLİŞİNASUNON

Ğura muşiş maçxorani 3’anas “Amagişi Masurate” Avni Memedoğlu, k’olek’sioni muşişen goşo3xuneri ğarape na geidginasunon suratişi merçapaten molişinasunon. Xeşnoxveneş Cebxeşk’elen organize na ixvenen merçapaş gon3’k’imuşi k’okt’eili, 6 3’ilva 2007 İk’inaçxaşi ndğas saat’i: 14.00-s i3’opxinasunon. Akbiyik Değirmenişi kuça No:33/A Sultanahmet/Mp’oli adresas na ren Gamamçkumala Sorunişi K’olekt’iviş K’ult’uraşi Salonis na guin3’k’asunon merçapa, 6 3’ilva - 24 3’ilva 2007 tariğepeşi şkas Mjaçxaşi ndğaş xarici k’arta ndğas 10.00- 18.00 saat’epeşi oşkendas guilinen.

Avni Memedoğlu dibadu 1924-s, Aşkaleşi oput’e Taşağilis. Vitoar bereloni umuteli do let’a na var uğut’u ar nana-babaşi majurani bere rt’u. Entepeşi p’ap’ulepe ibargeret’u am oput’es, 1820 3’anas Ovacikişi oput’e Mokiko/ Eğrikavakişen oxicretuten. Dido ç’it’a ar bere rt’uşi, suratepe ğarupt’u k’idalepes noşkeriten, markvalepeşi t’k’ebepesti ofidi-toli ğarupt’u. Doçodinu Erzurumiş Gazipaşaşi geç’k’apuroni n3’opula. Oşkenduri n3’opula Erzurumişi lises ik’itxuş k’ule Erzurumişi mamgurapaleş n3’opula notamamu. İk’itxu Mp’olişi Mskva Xeşnoxvenobaşi Ak’ademias.

1944-s, kok’içinu ist’oriuli (TK’P’) Turkiaşi K’omunist’uri P’art’ia k’ala. Legaluri ok’vak’idinuşi doloxe na rt’u Mağali Gamantana Ağanmordelobaşi K’erk’eli k’ala arto rt’u. 1944- 1945 TK’P’-şi oç’opinobaş k’ule na ik’ideret’u P’rogresist’i Ağanmordelobaşi Artonoba do Mo3’qvinobaşi K’erk’elişen ambaroni rt’u. 1950 3’anaş TK’P’-şi oç’opinobaşi ar nomeroni do3’oneri rt’u. “Ozturk” gedveri muşi k’ercoxo “Memedoğlu”şa goktiru (1958). Mskva Xeşnoxvenobaşi Ak’ademiak on3’opupt’u burjuva do ç’it’a burjuvapeşi berepe, maamage xalk’işi berepe var. Am sebebiten Kemal İncesu, İhsan İncesu, Hikmet Aksut, Marta Tozge (Necat Tozgeşi çili) do Vahi İncesu coxoni masurate megabrepe muşi k’ala k’idu “K’erk’eli Ağant’ot’i (1959). 1. (TMP’) Turkiaşi Madulyeş P’art’iaşi ok’idus roli aqu. Eminonuşi k’omisias ixandu. TMP'-s lik’vida3ialuri gagnapas uk’rit’ik’u. 1971-s ge3’opxineri P’rolet’aruli Magektaleş Ok’oxtalaşa ak’atu.

Muşi suratepes ğaru Afrik’aluri Lumumba, Latin Amerik’anuri Aztek, İnka, Mç’itat’k’eboni, Amerik’anuri Zanci, Xolosoni Yulvaluri Acemi, Arabi, Turki, Kurdi, Suriani steri maamage xalk’epeşi skidalape. Madulyeşi k’lasi do maamage xalk’epeşi globaluri oxoşkvaş ok’vak’idinuşi gzamşine rt’u. Madulyoba, umuteloba do gurişç’vinaten golaxtu muşi skidala. Mp’oliş Muni3iapalit’işi Obinalobaşi Direkt’orobas ixandu, p’rofe3ia do maxeşnoxvenoba muşiten artneri na va rt’u dulyapes. T’ekaudi iqu ekşenti. Avni Memedoğlu doğuru 9 Gimua 1998-s Mp’olis. Kanlicaşi oğurunales let’as niçinu.

Muşi t’ablopeşen namtinepe aşo ren: “P’ort’re: Kumkapuri Melahat”: (1958); “Teselli”: 1978- 83 (imaxkeminu); “Kelebçe”: 1960 (imaxkeminu); “Axope Ç’k’irupt’aşi”: 1968; “Mç’k’eşi”: 1963; “Nişanonepe”: 1960 (imaxkeminu); “Ok’o3’k’inu- K’oreaşa Na Ulun Malime: 1960 (imaxkeminu); “Beyazitişi Meidanis Na İncirs Ğureli: Turan Emeksiz: 1961 (imaxkeminu); “Missuri Komoxtu- Pencere”: 1962 (imaxkeminu); “Kerxaneşen Z’irapa”: 1988; “Ç’umani”: 1958.



                                                                                                                                                              TÜRKÇE