DUDBUT'K'A

SARPİŞ OBAJE İMODERNİZİNASUNON

Modernizasioniş p’rogramaşa na eizdinu Sarpiş obaje, k’idi-oxandi-meçişi modeliten ağneburot inşa do oktaluş tatbik’işi akt’is, Dudnaziriş Manuşvale do Oxen3aleş Naziri Hayati Yazici, Obajeş Musteşari Mehmet Emin Zararsiz, Turkiaşi Odapeş do Borsapeş Artonobaşi (TOBA) Dudmaxvenci M. Rifat Hisarciklioğlu do Obaje T’urizma K’omp’aniapeşi A.Ş. Maktaleş K’onseişi Dudmaxvenci Arif Parmaksizişi ok’atuten imza geidvinu. İmzaşi seromoniaşa Artvinişi Naziri Ertekin Çolak, TOBA maktaleş k’onseişi mak’ature do T’amt’raşi TİO (Ticaret’işi do İndust’riaşi Oda)ş Dudmaxvenci Şadan Eren, Artvinişi TİOş Dudmaxvenci Kurtul Ozer, Rizinişi TİOş Dudmaxvenci Omer Faruk Ofluoğlu, Xopaşi TSOş Dudmaxvenci Sinan Altunsoy do Arkabişi TİOş Dudmaxvenci Atif Kesimikti ak’atu.

TOBAşi Dudmaxvenci M. Rifat Hisarciklioğluk, imzaşi seromonias na qu ğarğala muşis antepe tku: “Modernizasioniş p’rojepeşi beciti et’abepeşen ar teriti Okorturaşa na guin3’k’en Sarpişi obaje ren. Çodinuri 3’anapes Turkia do Okorturaşi oşkendas ek’onomiuri, so3ialuri do k’ult’uruli speropes na manz’inen dulyapek moxelapan. Mtinurot Okortura k’ala tercihoni ticaret’iş akt’i 2006 3’anas ixvenu do oxoşkveri ticaret’iş akt’iş et’udepeş otamamuşa m3ika doskidu. Am akt’epek jur dobadonaşi xolosoni solidaroba umosi monz’inasunon. Jur dobadonaşi oşkendas 90 ndğaşakis vizaşi muafiet’i edo xolo Batumişi haerop’ort’iş oşkendari oxmaru steri namtini k’ai dulyapeti na itesisinu mskva k’ont’akt’epeşi gamoçkinepe ren.

Okortura k’ala Turkiaşi oşkendas galeni ticaret’işi hacmi 800 milyoni dolarişa nunç’işu. Temelurot inşaat’iş malzemepe do gidaşi mahsulepe k’ala na ixvenen galengamaçamuş rak’ami, 2007 3’anaşi çodinas 500 milyoni dolari iqvasunon yado imendinen. Sarpişi obajeş modernizasioniş k’ule am rak’ami iptineri 3’anas 1 milyari dolarişa, xuti 3’anoni p’eriodisti 3 milyari dolarişa monz’inu inoğirinen. K’arta am dulyape do noğirape k’ala regionis int’erna3ionaluri nunç’işoba do energiaşi k’oridorepes na uğun p’ozisioniti, Sarpişi obajes modernizasionişa dido becitoba mogapaps. Andğaneri ndğas Sarpişi obajes ar 3’anas mtelot 180 şilya k’onari mankana do 1,3 milyoni magzaleşa xizmet’i niçinen. Modernizasioni içodinaşi 500 şilya mankana do 3 milyoni magzaleşa xizmet’i na niçinen xalişa niktasunon.”

Dudnaziriş Manuşvale do Oxen3aleş Naziri Hayati Yazicikti imzaşi seromonias na qu ğarğala muşis; Sarpişi obajes na ik’idinasunon tesisepeşi na itahmininen mtelot ğirsi, 40 milyoni 747 şilya 398 lira iqvasunon ya tku. Yazicik, am p’rojeş oxvenuşi ora şeni sva muşi o3’iruşi tariğişen 12 tuta, oxandinuşi ora şeniti 20 3’ana ren yado ognapu. Yazicik, tasdik’ineri p’rojeş doloxe, obajeşi maktale do ticaret’uri binape, amaxtimu-gamaxtimuş k’ont’rolişi unit’epe, oguruşi hangari do mt’ineri eşiapeşi dep’ope, mankanaş k’ont’rolişi sist’emape, p’eronepe, k’ant’arepe, xe na geidvinu mankanape şeni park’i, t’irişi park’i, zuğaşa nodgitinuş p’roje do antepeşi elekt’rik’a, elekt’ronik’a, emniet’oba do mek’anik’aş sist’emaşi alet’i do teçhizat’i k’ala tudenst’rukt’uraşi xandape iqvasunon ya tku. Sarpişi obajeş xizmet’işi ağani binape, ticaret’uri tesisepe k’ala notamamepeşi ok’idu, oktalu do odevruşi akt’i k’ala Turkias moderni xizmet’iş ağani misali çkva niçinasunon ya na tku Yazicik, obajepe şeni dido beciti edo xolo muç’o eşo ek’onomiaşi cerğvepe 3’opxupan yado oxo3’onapu.