|
"UPERONİ" BUK'ALEMUNİ
Buk’alemuni ren ntxalari Chamaeleonidae familiaşen. Murenki, buk’alemunis majura ntxalarepeşen dido çkvanerobape uğun. Namtini çkinerepek ok’atupan ntxalarepe Rhiptoglossa coxoni tudenk’erk’elis. Buk’alemuni içinen, k’uçxepe, nena, tolepe, formi do peri oktiruşi k’valifik’a3ia muşiten. Buk’alemunis uğun otxo cinsi. Nanç’inerotti otxoneçdovit sort’i uğun. Buk’alemuniş sort’epeşi mtel mak’aturepek skidunan Mcveşi Kianas. Muşi gverdişen met’i Madagask’arişi k’un3’ulas, majurapeti skidunan Didi Saxaraş Çolişi omjoreşk’ele. Sort’i Chamaeleon skidun, Xçezuğaşi Esp’ania do Suriaşi şkas na geladgin t’erit’orias. Buk’alemunepe didopeten renan sort’i Chamaeleoşen. Ncalepuna do buçkuri dixapes skidunan. Sort’i Brookesiaşen na renanpeti skidunan let’aştude varna p’lak’epeşi şkas.
Buk’alemunepeşi ginz’enoba iqven 8 sant’imişen 60 sant’imişakis. Mara generalurot entepeşi ginz’enoba ren 30 sant’imi k’onari. Tamo-tamo gulun. Ar t’ot’iş jin, ar 3’utişi morgvalis didopeten vitojur k’uçxoni gza azden. Nena muşi nanç’inerot t’ani muşişen 1-1,5 fara ginz’e ren. K’uçxepe do k’udeli muşiten t’ot’epes gvak’iren. Menceloni renan. Muşi tolepek artikartişen oxoşkveri ikten. Ar toliten jin o3’k’ert’aşi, majura toliten tude a3’k’edinen. Gvakten muşi t’k’ebişi peri skit’a, jvarişi tonepe, k’eremidişi mç’ita, ç’uburişperi do uçaşa. Var viz’ira yado ç’ere do ğarepeti axvenen. Xuraşi k’elepe renan p’it’a. Muşi k’itepeşen juri artot, sumi artot renan oxodgeri. Kerp’et’eni steri ren. Xuraşi jileni do oşkendas uğun umosi didi ker3elape. Ginz’e oqopinot antepek ikipan cinikuri 3’ingalidoba. Çengeşen k’udelişa do didi ker3elapeş noxvene gonk’imeri peroni ar ğara iz’iren xuraşi tude. Muşi peri do deseni sabit’i var ren. Xaliten jvari, bresti, k’aveşperi, uça do antepeşi çkvadoçkva t’onepeşa goikten. Zeminişi periş jin uçala varna gon3’k’imeri peroni ar şerit’i iz’iren. Korbaştude, çengeşen anusişakis na iginz’anen skit’ala ğara didopeten muşi peri var iktiraps. Ağanmordalepeşi t’ani ren 24-30 sant’imi k’onari.
Buk’alemuni skidun ncalepes. Kerp’et’eni steri muşi k’uçxepe do k’udeliten t’ot’epeşi jin perpot gvalen. Avi oç’opu şeni dodgitun uoxonk’anoni t’ot’is. Xolosoni ar mendralas ar bombola z’iraşi, gamot’k’oçups muşi nena astaxolo do ç’opups muşi avi. 3’unak ar faras eçi k’onari markvali skups. Naşkumers muşi markvalepe na ntxorups let’aşa. Elipsuri na ren markvalepeşi ginz’enoba iqven 18-20 milimi k’onari. Turkias, buk’alemunepek skidunan Xçezuğa do Egeşi regioniş mçxvapa do ncaloni dixapes.
|
TÜRKÇE
