DUDBUT'K'A

OBONALES AMAXTAŞİ GAMÇXVAPEN!

Obonale ren Arabuli tkvala. Obonaleşi tariği Romaurepeşakis nunç’işun. Vezuvişi volk’ani tk’va3uşi, mt’verepeşi tude na doskidu Pompeis na ixvenu ark’eologiuri ntxorapek, Romaurepek na ixmart’es mcveşi obonalepe kogamiğu. Obonalepe xvala xura obonu şeni var, keifi do seiri oxvenu şeniti na ixmarinet’u oxoi3’oninu. Romaurepes k’lasişi çkvaneroba uğut’es. Emuşeniti, kole do asilepek na ixmart’es obonaleş nek’nape do xura na ibont’es k’ortape çkvaneri rt’u. Romauri obonalepes uğut’es buxariş banioşi k’orta, qini do t’u3a 3’k’arişi havuzepeti.

Mp’olişa xe geidvinuş k’uleti, Mp’olis do Osmanuri dobadonaşi k’arta raionepesti ik’idinu ağani obonalepe. 17. oş3’anuras, 168 didi bazauri obonale kort’u Mp’olis. Obonalepes uğun sumi k’orta: Mo3’k’uşi k’orta, xura obonuşi k’ortape (oqinoba do obonale) do k’ulxani (ot’ibinuşi k’orta).

Mo3’k’uşi k’orta: Ar didi saloni do muşi gomorgvas ren divanepe. Muşi xura na ibons mitxanik moişvacups akonaşis. Xura obonuşi k’orta: Oqinobaşi gzaşen mek’ilen. Obonaleşi k’ortaşa amilen. Akonaşisti ren namtini k’ortape. K’urnabaşi: K’artaik tito-tito na ibons k’orta ren. Halveti: Trageri do xvala na iboninen hucre ren. Gobektaşi: Jin muşis na incirinen upi geçamuşi k’orta ren. Am k’orta, obonaleşi mermeri zeminişen umosi mağali ren. Oşkendas ren. Çkvadoçkva geomet’ruli figurepe na uğun k’orta ren. K’ulxani (Ot’ibinuşi k’orta): Obonaleşi tude ren. Daçxiri iç’ven akonaşis. Daçxirişen na gamulun paluri do k’omapek mermeriş zeminişi tudeni gzapeşen do k’idalapeşi doloxendo golulun. Paluri do k’omapek gamulun tutekluği (omk’ominoba) na itkven k’omantoruşi gzaten.

K’ulxaniş daçxirişi jin t’u3a 3’k’arişi k’ardali iz’iren. Am t’u3a 3’k’arişi dep’oşi jinti qini 3’k’arişi dep’o iqven. Daçxirişi tudeni k’ortapes na ren ar-jur arxi, gobektaşişi tudeşakis iginz’anen. Daçxiris na iç’ven dişkapeşi paluri do k’omapek am arxepeten gobektaşiş tudeşa iginz’anen. Am kvaş tudeni m3’k’upi k’orta dido na it’ibinen şeni, em k’ortas itkven cexennemi.

Bazarişi obonalepe namtini ndğalepes oxorcalepeşa, namtini ndğalepesti k’oçepeşa gon3’k’imeri iqven. T’k’ubi na ren obonalepeti renan oxodgeri artikartişa. Arti oxorcalepe, majurati k’oçepe şeni ren. T’k’ubi obonalepe k’arta ndğas gon3’k’imeri iqven. Bayeziti, Çemberlitaşi, Hoca Paşa, Findiklişi obonalepe, Fatihis na ren Mehmedağaşi obonale ren Mp’olişi çinoberi obonalepe.



                                                                                                                                                              TÜRKÇE