DUDBUT'K'A

XEMAXVENCOBA VARNA ŞANSİ?

Tavla, xemaxvencoba do şansi na ok’uik’aten, sixironi do dido mcveşi ar sterapa ren. Tavla ren ar Arabuli tkvala. Tavla ren ar sterapa, na isterinen jur şurişk’elen pi3arişi ar p’lat’formaşi jin 15 uça, 15 xçe puliten. İptineri fara, 1400 3’anaş 3’oxle Sp’arsepeşi Şahi Nevşiyanişi veziri Buzur Mehirik z’iru yado icerinen. Artikartis na nodgitun anşot k’ortak 12 tuta, 15 xçe do 15 uça pulik tutaşi 15 seri do 15 ndğa, artikartis na nodgitun eçdojurot k’ortakti ndğaşi 24 saat’i otemsilaps yado icerinen.

Tavlas uğun nanç’inerot 4.500 nank’apaşi bekimoba. Am sebebite, oust’at’inu beciti ren sterapas. Murenki zari k’ala na mulun şansi oxmaruti beciti ren. Namtini odudepek ixmarnan “moderni” do “t’radi3ialuri” tavla steri t’erminepe. Moderni tavlas, zarepe it’k’oçen fincanişi doloxendo. Tavla ren epto gopineri Turkias. Ust’at’i masteralepek ixmarnan zariş k’ombina3iapeşi Sp’arsuli coxepe. Tavlaşi sp’ort’i Turkias dido gopineri rentina, var uğun ofi3ialuri st’at’usi. Regularulot tavlaşi t’urnirepe na 3’opxups do tavlaşi sp’ort’i ofi3ialuri oxvenu şeni gza na gorups ar federa3ia koren. Coxo muşiti ren “Turkiaşi Amatoruli Tavlaşi Federa3ia”.

Zarepeşi namtini k’ombina3iapeşi coxope aşo ren: 1-1: Hep yek (Mtelot ar); 2-2: Du bara (Jur do jur); 2-1: Du yek (Jur do ar); 3-3: Du se (Sum do sum); 3-2: Sebai du (Sum do jur); 3-1: Se yek (Sum do ar); 4-4: Dort cehar (Otxo do otxo); 4-3: Ceharu se (Otxo do sum); 4-2: Cehari du (Otxo do jur); 4-1: Cehari yek (Otxo do ar); 5-5: Du beş (Xut do xut); 5-4: Penci cehar (Xut do otxo); 5-3: Pencu se (Xut do sum); 5-2: Penci du (Xut do jur); 5-1: Pencu yek (Xut do ar); 6-6: Du şeş (Anşi do anş); 6-5: Şeş beş (Anşi do xut); 6-4: Şeş cehar (Anşi do otxo); 6-3: Şeşu se (Anşi do sum); 6-2: Şeşi du (Anşi do jur); 6-1: Şeşu yek (Anşi do ar).



                                                                                                                                                              TÜRKÇE