|
DUDNAZİRİ MEHMET RECEP PEKER
5 K’undura 1889 tariğis Mp’olis dibadu. Kocamustafapaşaşi Malimuri Ruştiyes do İdadis ik’itxu. 1907-sti notamamu Malimobaşi N3’opula. 1911-şen 1912-şakis Yemeni do T’rablusgarp’i do 1912-şen 1913-şakisti Balk’anişi limapes ok’vak’idu. Limas, Rumeli do K’avk’asiaşi front’epes misia uğut’u. 1919-s, notamamu Generaluri Şt’abobaşi N3’opula. Oxoşkvobaşi limas ok’atu şeni, K’undura 1920-s, mek’axtu Anatoliaşa. Şilyaşdudi rutbeten 20. didarmias misia niçinu. 23 İgrik’a 1920-s na guin3’k’u Meclisişi Mdivani iqu. 1923-s i3xunu dep’ut’ati Kutahyaşen. Jur p’eriodiş morgvalis, meclisişa amaxtu. Mk’ule ar p’erioditen “Hakimiyet-i Milliye” (“Na3ionaluri Xe3ala”) coxoni gazetaşi dudmaç’arale iqu.
1924-şen 1925-şakis Galeni Dulyapeşi Naziri iqu. Ok’oktiroba, Noğaroba do Obargobaşi Nazirobas manuşvaloba qu. 3 do 4. İnonuşi xe3alapes 1925-şen 1927-şakis Dudoçvalobaşi Naziroba do 1928-şen 1930-şakis Noğarobaşi Naziroba qu. Mussolinuri do Hitleruli rejimepeşa megabruli ar p’olit’ik’as numxvacu. 1931-s Xalk’işi Resp’ublik’uri Furk’aşi generaluri mdivanobaşa i3xunu. 1933-s Mp’olişi Universit’et’is Gektalobaş İst’oriaşi dersepe meçu. 1931-şen 1936-şakis P’rezident’i Mustafa Kemal do Dudnaziri İnonu k’ala artot ar p’art’iloni rejimişi masumani beciti k’oçi işinu. 1936 3’anas Mustafa Kemali k’ala simadaluri ok’o3’k’obaşi sebebiten p’art’iaşi generaluri mdivanobaşen geit’k’oç’inu. 1936-s coxşç’ara gedvineri Montroşi ak’titen Turkiak galeni p’olit’ik’as Englandia k’ala megabrobaşi p’olit’ik’as noqonu işinen am get’k’oçinuş sebebi.
Mehmet Recep Peker, Mariaşina 1946-s, k’idu dido p’art’ialuri p’eriodişi maartani xe3ala. “Halk Evleri”şi (“Xalk’işi Oxorepe”) gamoçkvaluri organi na rt’u “Jurnali Ulku”s (“Jurnali İdeali”) gamaçkvineri Gektalobaş İst’oriaşi dersepeş not’epe gamiçkvinu “Gektalobaş İst’oriaşi Dersepe” coxoten, 1935-s. 2 İgrik’a 1950-s, şuri muşi meçu Ğormotis Mp’olis. Fransuli do Germanuri na uçkit’u Peker rt’u xut bereşi baba.
|
TÜRKÇE
