|
MANAXONDE K'İDİ
K’idi ren Picinae tudeni familia na 3’opxups m3’k’ili k’ik’iloni mskva peroni k’vinçepeşi oşkendari coxo. Namtini k’idepes az’angenan 15- 20 fara ar saniyes doloxe. Jur z’angapa muşi şkaş ora, ar saniyeşen m3ika ren. Mbulişi didinobas na ren kuni muşis var unç’un am oxvat’obapek. K’idişi uçkinoba ren muşi musk’ulepes. Oz’angus geç’k’aşi, dudi do k’ik’ilişi şkas p’araleloba aqven. Am p’aralelobaşen ç’iç’it’a ar goktalak nusebebus kuniş noç’k’vidus. K’idik k’ik’ili muşiten ncas noz’angaşi, dudi muşis aqven didi ar oxvant’oba. Aşo şurişuris ar z’angapas var uğun çkvaneroba duditen bet’onis not’k’va3uşen. K’idişi k’ik’ili do dudişmotvak artikartişen ok’ui3’k’en, am z’angapapeşi oras na gamulun şok’i na 3’u3’onups sungeri steri ar maddeten. Am çiçku maddek 3’u3’onups k’arta z’angapas na gamulun şok’i do ok’uleni şok’isti na naxondinasunon xali 3’opxups. Ncalepes zarari na meçaps bobonç’va do munt’urepe na ç’k’omupan şeni feidoni renan. Pukrinoras na omzgudups ncalepeşi t’k’ebepe, dişkaşi burmeşakis z’angups k’erk’elişi şek’lis. Am dulyak ncalepeşi oskurus na nusebebups şeni, mabağepek atxozepan.
K’idik nez’i, bademi steri k’ap’et’i xeç’ep’oni do didi k’ak’aloni xilepe meşorçak’aps ncalepeşi t’k’va3inerobapes. Ok’uleti imxornan am xilepeşi gurepe. Ncalepeşi t’k’ebepe z’angups, entepeşi tude mpuleri bobonç’va do munt’urepeten skidun. Otxo k’iti uğun k’uçxepe muşis. Jur 3’oxlenk’ele do jurti k’ap’ulaşk’ele. Mk’vature do k’irk’oleri bu3xape uğun. Entepeten okaçaps ncalepeşi t’anepe k’ap’et’ot. K’udeli muşi 3’ori do uk’irk’oleri ren. M3’k’ili, bundğaloni, menceloni k’udeli muşişen mxuci z’irops. Mk’ul-mk’ulot o3xont’uten arşvacis ncalepeşi t’anepes memxu3’ups. Çkvadoçkva peroni na renan k’idepe iz’iren. Ginz’enoba mutepeşi, sort’epe muşi şeni, 9-şen 50 sant’imişakis iqven. Dido mşkurnace ren. Am sebebiten, ubargeri mt’k’alepuna, park’i do bağepes skidun. Didopeten ncalepes na uğun obğepes skidunan. İkips am obğe k’ik’ili muşiten oxut’oluten.
Qalişi musk’uli dido 3’oxlextimeri ren. K’ik’ili muşi ren ginz’e, k’ap’et’i do menceloni. K’ik’ili muşi sk’arp’ela steri ixmars. Aşopeten z’angups ncalepeşi t’k’ebepe. K’idişi nena ren ginz’e. 3’i3’is nungaps. Şurişurisobaten mendralas nanç’işinen. Nena muşişi cinsik ekol-akol na alen-malen k’ik’irdak’oni ar k’ortas mek’ireli ren. Emuten, nena mendralas nunç’uşun perpot. Nenaşi k’un3’uli ren men3axeroni do k’ank’uloni. Aşopeten munt’uri do bobonç’vas uzipk’inups, entepe zdips ncaş tude na ren sotxanepeşen perpot do meç’opups. Namtinepes uğun mç’ipe, k’ap’et’i do daz’ipinape, nenaşi k’un3’ulis. K’idik z’angups muşi k’ik’iliten ncaşi t’anis oraşen oraşa. Edo nusimins doloxen na gamulun xonarepes do munt’uri na skidun oxo3’onaps. Aşopeten m3udişi var ixandeps. K’idik oxo3’onaps t’k’ebiş tude na skidunan bobonç’vapeşi svalepe uz’iramuten. Aya muç’o axvenen yado k’oçis meraği aqven.
Omzik’uşi p’eriodis, xomula ncalepeşi t’ot’epe z’angups. Na eçkindun t’ik’-t’ak’işi xonariten 3’unapes ucoxops. 3’unak skups 2- 3 xçe markvali. Kimoli mulun do em markvalepe tasups. 3’una- kimolik 16 ndğaşen 18 ndğaşakis siraten monç’valoba ikipan. Motalepes didopeten kimolik o3’k’en. P’olusi, Avust’ralia, Madagask’ari do Ok’ianusis ar-jur k’un3’ulas var, mara nanç’inerot k’arta svas skidunan.
|
TÜRKÇE
