DUDBUT'K'A

K'OLXOBA.ORG JUR 3'ANERİ İQU…

K’olxepeşi xonari oqopinuşi misiaten na oç’andinaps sait’i çkini jur 3’aneri iqu. Cinci mutepeşi K’olxepeşa na nunç’işun mara andğaneri ndğas Lazi yado na icoxenan, ğura mutepeşiş oras Lazi yado na ğurasunonan, K’olxobaşi k’ardalis na ixarxales do çkvaneri minoba k’abuli na var qvasunonan moiquruten oç’andinus na geç’k’u sait’i çkini masumani 3’anaşa amaxtu.

“İst’oriuli minobaşi ç’k’uaşa nena muşiten xe3ala na var uğunpes k’ult’uruli renoba var amordinenan” yado mtinobaten gzas gedgineri na ren k’olxoba.orgik, nananenaş cinconi minobaşi k’abği meçaps. Lazuri, simbolurot do folk’lorulot var ak’ademurot do akt’ualurot na ixmars sait’i çkinik, çkar mencelişa var arxvala Lazi xalk’is do K’olxobaşi ç’k’uanerobas nuxizmet’ups. P’ap’uli do nandidepe çkinişen ezdimeri bandara bere do motape çkinişa nunç’işinu şeni unk’apun. Şaxsuri rek’lama do coxo ognapuşi derdi uozduten do k’olekt’iuri xanda oxvenuten tarixişa not’i geç’arups.

Nananenaşi p’roblema xvala 3’anaşi ar ndğas var k’arta oras na isimadeps, nananena mutepeşi oskedinu, omordinu do moxtasneri nesilepeşa nunç’işinu şeni 3’anaş k’arta oras na ixandeps, na imgars var na nodgitun sait’i çkinik; arxvala p’aşura, hekaye, leksi, birapa steri ananuri speropes vardo so3ialuri-p’olit’ik’uri-ek’onomik’uri temaloni gamaçkvalapesti go3’vancğonen. Aşoten Lazuri nenas niçineri ‘folk’loruli doskidinu’şi rolişa nodgitun do Lazuri, st’at’ia na iç’arinen, gazeta na gamiçkvinen, ansik’lop’ediuri madde na iç’arinen ‘moderni nena’şi sevieşa nunç’işinuşi 3ada meçaps. Lazuri na xvamasunon do ok’ap’et’anasunon gagnapa na var uğun çkar xanda noğira muşişa na var nanç’işinasunon do k’un3xi na var niçinasunon na uçkin k’olxoba.orgik, samimoba do seriozulobaten oxandus naqonops. Jur 3’anaşen doni Lazuri do cuma nena Margalurişi monz’ineri xonari oqopinu şeni udodgineri goşigorops do goşin3’k’edups.

Çkin vixandept, Ğormotik memişvelnan.



                                                                                                                                                              TÜRKÇE