|
MUZEUMEPEŞEN P'AT'İ ŞURAPE GAMULUN
Xususurot muzeumepeşen mutxanepe oxiru unonanpe organize- oqopinot ixandepan. Muzeumepeşi maxiralepe, a3’işakis na miçkit’es maxiralepe steri va renan. Edo oput’uri gagnapaten var ixandepan. Xalk’uri gurami na rt’u Robin Xut’i steriti va renan. Am maxiralepes ist’oriati uçkinan, geografiati. İnt’erna3ionaluri k’ont’akt’epe do bazarepe uğunan. Edo entepes k’itxeri do sp’e3aialist’i k’oçepeti uqonunan. Şanşiten dulya var ikipan. Entepes dido modernuri oxiruşi met’odepe uğunan. Modernuri maxiralepeşi muşt’erepe çkva terepes skidurnan. Am xark’uri muşt’erepek am maxiralepes sip’arişi meçapan. Maxiralepekti muşt’eri mutepeşi guri şeni ixirnan. Mu ren ki, maxiralepe do muşt’erepe artikarti var içinopan. Xampa muşt’erepek ant’ik’uri objepe qoropan, geç’areli uğunan. Va rnati çkvalepeşi coxoten eç’opupan xireli objepe. Maxiralepekti didopeten advant’urist’i renan. Edo entepe şeni geç’arelişen met’i, xirobaşen entepes na aqvasunonan emo3ia beciti ren. Muşt’erepe mutepeşişen siparişi-meçameri na renan maxiralepek iptinerot noğira muzeumis na ixandeps mitxani varna mitxanepe k’ala megabroba oxvenuşi gzalepe gorupan. Am megabrobaşi şvelaten, muzeumis na ren do entepek oxiru na unonan objepeşi fotoğrafepe yeşiğapan. Emuşk’uleti am objepeşi qalbi mutepeşi ikipan. Edo originaluri objepe na ixiru maxiralepek originaluri steri na ren qalbi objepe megaşkumernan. Aşopeten mitisti mutu var oxo3’onops. Aya ren modernuri maxiroba.
Mk’ule p’eriodi 3’oxle, Uşakişi Ark’eologiuri Muzeumişen “Msvaloni Zoğaşi 3xeni” coxoni broşi am modernuri met’oditen ixireret’es. Na içkinen steri “Msvaloni Zoğaşi 3xeni” coxoni broşi, Xarunişi Xazinaşi dido ğirsoni do beciti ornament’epeşen ar teri ren. A3’iti artneri met’oditen Kahramanmaraşişi muzeumişen 545 3’ali sikke nixires. Am maxirobaşi dulya şeni Kahramanmaraşişi valik ar ognapa meçu. Valik, “K’ult’ura do T’urizmişi Nazirobaşi mufett’işepe do ark’eologepek muzeumis na ren objepeşi ok’oro3xus naqonupan,”-ya tku. Edo aşo naqonu: “1998 şi 3’anas, muzeumişi am oraşi direkt’orik tayiniten iduşi, 7 tutaşi morgvalis, depoşi memurik vekaleti duxvenu. Xolo muzeumişi direkt’orik mak’ami muşişa moxtuşi, muzeumis na renan objepe k’oro3xa uxvenuten naqoneren dulya muşis. Çkinda na moxtu ixbarepeşi sebebiten nazirobas ambari mepçit do entepekti k’oro3xan yado mufettişi do ark’eologepe memincğones. Edo entepek oxandus naqonapan. Ok’oro3xu diçoduşi, 545 3’ali sikke qalbi na rt’u oxoi3’onu. Sikkepe, Krist’işen 3’oxleni P’ersuli Sartrapişi Mazaiosişi xemoşletinobaşi p’eriodişi, 361-333 3’anapeşi ren yadoti ognapapu mtelis. Valik, ”Ayak k’oçis derdi na meçaps do dido oncğoroni tema ren. Depoşi memuri şeni, idareluri insp’ek’3ia gevoç’k’init do emuş k’uleti p’reqot’urasti ixbari dop’it,” -ya tku.
|
TÜRKÇE
