|
"PUKİRİŞİ P'ASAJİ" (CİTE DE PERA)
Tanzimat’işi p’eriodis, padişahepek ulut’es Beyoğluşa, teat’ri oseyruşa. Andğaneri İstiklalişi cadde do Sahneşi sokaği na geladgin ğocis na geladgit’u teat’ri Naumişa ulut’es. Giuseppe Verdişi çinoberi op’era “İl Trovatore” isterineret’u teat’ri Naumis, P’arisişen 3’oxle. Teat’ri Naumi rt’u şineri k’ult’uruli 3ent’repeşen ar teri. 1870-s, Beyoğlus na yeçkindu didi oç’vas, teat’ri Naumiti diç’vu. 1876-s, Urumi bank’eri Hristaki Zografos Efendik eç’opu ç’veri teat’ri Naumişi let’a.
Urumi arkit’ekt’ori Cleanthy Zannos oğaraputen, oxvenapu bazari do ap’art’mani na iqvasunt’u ar bina. 1876-s, muşi ok’idoba na içodu binaşi tude 24 dukyani do jin muşisti 18 luksi oxori iz’iret’u. Dukyanepek na qu p’asajis itkvu “Hristakişi P’asaji”. Binasti “Cite de Pera” coxo geidvinu. P’asajişi maartani 3’anapes, na guin3’k’u dukyanepe aşo rt’u: Maison Parret do Vallauryişi pastaxana, İaponişi mağazia, Mapukire Natureli, Pandelisiş mapukireşi dukyani, Schumacherişi furni, Papadopulosişi mucellitxana, Keserciyanişi terzixana, Yorgoşi meyxana, Siderisişi kurkişi mağazia do Acemyaniş matutumeşi dukyani.
1908-s, binaşi mance Sadrazami Kuçuk Said Paşa iquşi, p’asajis “Said Paşaşi Ruba” coxo geidvinu. Daçxirk’vataşi 3’anas mapukirepek ibarges p’asajişi ç’it’a dukyanepeşa. Gimuaşi gektalaşen na imt’u Rusi oxorcalepe, baronepe, duşesepekti gamaçapt’es pukiri akonaşis. Cite de Pera ixmarinu pukiriş eç’opu-gamaçamuşi 3ent’ri oqopinot, ar p’eriodişi morgvalis. Beyoğluşi mtel mapukirepeti ok’uibğes p’asajis. P’asaji iqu “Mapukirepeşi P’asaji”. 1940-oni 3’anapeşen geç’k’uten guin3’k’u malude do meyxanape p’asajis. Mk’ule ar p’eriodi şk’uleti ap’art’manişi maskidalepe do mapukirepek kodibarges çkvadoçkva oxori do dukyanepeşa. Murenki p’asajişi coxo konuskidu “Pukirişi P’asaji” yado.
Dido ginz’e 3’anapeşi morgvalis, na dvaç’irt’u tamirepe na var ixvenu şeni, ar seris p’asaji astaxolobaten kodolixvu, 10 Mbulora 1978 tariğis. 1988 3’anaşakis em xalis doskidu. Belediye do p’asaji moşletinu şeni k’ideri “Pukirişi P’asaji Oskedinu do Omskvanuşi K’erk’ela”şi ini3iat’ivaten na ik’idu Pukirişi P’asajik xolo kogeç’k’u oxizmet’us, Xrist’ana 2005 tariğis.
|
TÜRKÇE
