|
LAZİSTANİŞİ FUT'BOLİŞ T'AKİMEPE
Lazistanişi fut’boliş t’akimepe şeni, fut’bolişi ligapes 2007- 2008 sezoni p’at’i golaxtu. Turkiaşi irişen mağali fut’boliş liga Sup’er Ligas na istert’u Rizinisp’ori, xususurot majurani gverdis na uğut’u p’at’i sterapa do ugecginobaş sebebiten Turkiaşi 1. Fut’boliş Ligaşa melu. Turkiaşi 2. Fut’boliş Ligaşi B k’at’egoriaş 4. k‘lasmaniş grup’is na isters do Uçazoğaşi 5 t’akimişen ar teri na ren Otinesp’ori, grup’is umelu şeni dido ibodu do çodinurot grup’is kodoskidu. Turkiaşi 3. Fut’boliş Ligaşi 2. grup’is na istert’u Xopasp’ori didi xusrani na zdu sezonişi çodinas, ligas maçodine iqu do amat’oruli ligaşa komelu.
Rizinisp’ori: Rizinisp’orişi k’lubi, 1953 3’anas geidginu. Geidginuşi oras skit’a-jvari na uğut’u perepe muşi 1968 3’anas p’rofesionaluri t’akimi muşi aquşi cğat’a-jvari yado iktirinu. 7 3’ana 3. ligas do 20 3’ana 2. ligas na isteru Rizinisp’orik, 1978- 1979 sezonis 2. ligas şamp’ioni iquşi Turkiaşi 1. Ligas osteruşi maartani fara hak’i aqu. Turkiaşi Sup’er Ligas; 1979- 1981, 1985- 1989, 2000- 2002, 2003- 2008 sezonepes 13 3’ana isteru.
Otinesp’ori: Otinesp’orişi k’lubi, 1973 3’anas geidginu. Geidginuşi oras jvari-cğat’a na uğut’u perepe muşi 1990 3’anas cğat’a-xçe yado iktirinu. 1991- 1992 sezonişen doni Turkiaşi p’rofesionaluri ligapes na isters Otinesp’ori, 2004- 2005 sezonis 3. ligaşi 2. grup’is şamp’ioni iqu do 2. ligaşi B k’at’egoriaşa kextu.
Xopasp’ori: Xopasp’orişi k’lubi, 1961 3’anas geidginu. Perepe muşi monoğe-xçe ren. 1988- 1989, 1991- 1992, 1993- 1994, 1996- 1997, 2000- 2001, 2003- 2004 sezonepes Turkiaşi 2. Fut’boliş Ligas na isteru Xopasp’ori, moxtanora sezonis Turkiaşi 3. Fut’boliş Ligaşa xolo extimu şeni ok’vak’idasunon.
Art’aşensp’ori: Art’aşensp’orişi k’lubi, 1967 3’anas geidginu. Perepe muşi bordo-xçe ren. 1991- 1998 3’anapeşi şkas Turkiaşi 3. Fut’boliş Ligas na isteru Art’aşensp’ori, andğas Rizinişi 1. amat’oruli fut’boliş ligas isters do xolo Turkiaşi 3. Fut’boliş Ligaşa extimu şeni mucadele ikips.
Arkabisp’ori: Arkabisp’orişi k’lubi, 1955 3’anas geidginu. Perepe muşi skit’a-uça ren. Andğas Artvinişi 1. amat’oruli fut’boliş ligas isters do Turkiaşi 3. Fut’boliş Ligaşa extimu şeni iboden.
|
TÜRKÇE
