|
LAZİSTANİŞİ CİXAPE
İst’oriaşi morgvalis dido noğarobaşa oxormancoba na qveret’u, çkvaneri xalk’epe na oskedineret’u, çkvadoçkva k’ult’urape na omordineret’u Lazistani; cixape muşitenti onç’elapaps. Nodgita, oçvala, oxosara steri noğirapeten k’ideri ist’oriuli dido cixape na gedgin Lazistanişi namtini cixape aşo ren:
Artvinişi cixa: Koprubaşi mevk’is gomorgvas na gejo3’k’en rak’anis, ğalişen 70 met’re mağalobas, Ç’oroxişi emtis na imağalen, tuden k’ele granit’i kvaş jin ik’ideren. Namtini kart’alepes do xalk’işi nenas Livane yadoti na icoxinen Artvinişi cixa, 10. oş3’anuras Bagrat’ionepeşk’elen geik’ideren yado isimadinen. St’rategiurot xali muşi şeni Osmanurepeş orasti ixvamineren. Cixas ar şap’eli do arti sarnicişi genomskide koren.
Zil cixa: Noğa Çamlixemşinişi 12 k’m omjore k’ele na geladgin Zil cixa, ğalişen 100 met’re, zoğaşen 750 met’re mağalobas gelidgineren. Furt’unaşi gulva k’ele kvalepunaşi jin molozi kvapeten nok’ide Zil cixa; galeni cixaşk’idape, oşkenda cixaşk’idape, doloxeni cixa, 8 dane burci do oxosaruşi dudarişen 3’opxun. Cixaşi yulva, omjore do olandeş k’ele okti ren do arxvala gulva do ç’it’ati olandeş k’ele mağali cixaşk’idape uğun. Ğocepe muşis 1,5- 2 met’re mçirenoba uğun. 13. oş3’anuras K’omnenosepeşk’elen noxvene ren yado na isimadinen cixa, Osmanurepekti ixmares askerilu noğirapeten k’ortas xe gedvesş k’ule.
K’ulanuri cixa: Noğa Atinaşi gulvaş k’ele ç’it’a ar gverk’un3’ulaş jin ik’ideren. Kvalepunaş jin na gedgin cixas let’a k’ala gza konik’vateren. Nanç’inerot 7x7 met’re ebat’i na uğun cixaşi ğocepe dido mskva madulyobate xveneri na ren iz’iren. Amaxtimoni nek’na gulva k’ele uğun. Omjore k’eleni cixaşk’idape kodolixveren. Udoloxve ğocepes mazgalişi pencerepe do jileni mok’irk’e pencerepe uğun. Mipeşk’elen noxvene mtinot var içkinen mara 13.- 14. oş3’anurapes T’amt’raşi Oxen3aleş oras ik’ideren yado i3’oninen. Osmanurepeşi p’eriodis in3’uraneren do ixmarineren.
Rizinişi cixa: Noğaşi omjoregulva k’ele na geladgin Rizinişi cixa 3’opxineri ren, doloxeni cixa do 3’aleni cixaşen. İptineri ok’iduşi tarixiş mtini çkina var uğun. Doloxeni cixa İ.U. 6. oş3’anuras ağneburot ik’ideren do 3’aleni cixati 14. oş3’anuraşi geç’k’as Genourepeşk’elen geidgineren. Osmanurepeşi p’eriodis cixa, itamirineren do ixmarineren. Namtini burmepe 3’ori, namtini burmepeti molozi kvapeten xveneri doloxeni cixaşi k’idape ren 1,5 met’re mçirenobas do gverdi daireş p’lanoni xut dudari uğun. Mcveşoras doloxeni cixaşen olandeyulva do olandegulvaşk’ele na golaz’it’u do zoğaşa na nunç’uşut’u 3’aleni cixaşen andğas gulva k’eleni cixaşk’idapeşen ar burme do namtini dudarepe genomskideren.
T’amt’raşi cixa: Didopete udoloxve cixaşk’idapek 3’opxups noğaşi mcveşi binape. Andğaneri cixaşk’idapeşi irişen mcveşi burme Romaşi p’eriodişa yani İ. U. 5. oş3’anuraşa itarixinen. İ.3’. 5. oş3’anuras noğa z’irameri Kesenefonik molaşinaps cixaşk’idapeşen. T’amt’raşi cixaşk’idape Jileni hisari, Doloxencixa, Oşkenduri hisari do 3’aleni hisari yado sum burmeşa ok’oirten. Jileni hisari k’ala Oşkenduri hisari, ğali K’uzguni do İmeretişi şkas mağali kvalepunaş jin geik’idineren. Am burmek 3’opxups cixaşi irişen mcveşi burme do ğula otxonaris nungaps.
|
TÜRKÇE
