DUDBUT'K'A

LAZİSTANİŞİ GOLAPE (RİZİNİ)

Rizinişi golape germa K’açk’arişi nap’icepes do ilçe Çamlixemşini, Xemşini do T’k’ubiğalişi sinorepeş doloxe gonç’imeri ren. Rizinişi golapeşen namtinepe ren: Paloviti, Eleviti, Oviti, Amlak’iti, Xodeçur, Samist’ali, Pok’uti, Çati, Xaçivanak’i, K’armik’i, Xemşini, Dudgola, Şkagola, Verçenik’i, Avasori, K’açk’ari, K’avroni, Xazindak’i, Pukironi, Çaimakçur, Sali, Varda, T’ibagola, Cimili, Xazende, Bağuloni, Çaxperik’i, K’ito, K’arapi, Cixa, Gurmanumani, Varoşi, Çermeçk’i, Daxteri, Anzeri, Faso.

Gola Ayderi: Çamlixemşinişi 19 k’m omjoreyulvaş k’ele ren. Uçazoğaşi golapeşen irişen çinoberi ren. 350 m mağaloboni golas irxolo xizmet’i çodineri uğun. Xampa flora do fauna k’ala abano muşiti çinoberi ren. Germa K’açk’arişa eşanç’inuşi gzaş jin na golaz’in golaşi gomorgvas, mok’irk’e kraoni germaşi txa, vaşak’i, mtuti, mgeri steri mt’k’uri skindinape na skidunan iz’irinen.

Gola K’avroni: Çamlixemşinişi 19 k’m omjoreyulvaş k’ele na ren 2.700 m mağaloboni golaşa Ayderişen 10 k’m gzaş k’ule ninç’işinen. Gola K’avroni, germa K’açk’arişi dudişa (3.937 m) nanç’inerot 8 k’m mendranobas ren. Emuşeni germa K’açk’arişa na eşinç’asunon magermepeş ok’amp’uşi iptineri sva ren.

Gola Verçenik’i: Çamlixemşinişen 60 k’m mendranobas ren do 2.600 m mağaloba uğun. Germa K’açk’arişa, Xemşinişi vadişen golaxtimeri gola Verçenik’işenti eşinç’inen. Majura gzape gola Çati do K’avroni ren.

Gola Siçoği: Çamlixemşinişen 22 k’m mendranobas ren do 2.600 m mağaloba uğun. Oput’e Meydanişen k’uçxete ogzaluten 5 saat’is ninç’işinen. Z’irapa muşi dido golapes na var uğun k’onari mağalobaş p’rofiloni ren. Didopete maavepek tercihi ikipan.

Gola Paloviti: Çamlixemşinişen 70 k’m mendranobas ren do 2.600 m mağaloba uğun. Gola Troviti mejaxtimute ilinen. Çilingiri, Şkaoput’e, Çaneva do Meleskuri coxoni burmepe uğun. Vadişi jin na golaz’in irişen didi gola ren. Palovitik, gola Samist’ali, K’avroni do Ayderişati gza meçaps.

Gola Pok’uti: Çamlixemşinişi jindole ren do 2.100 m mağaloba uğun. Çamişi mçire mt’k’apete gok’ireli gola Pok’uti, otrek’ingu do fot’ografi eşağu na unonanpe şeni uz’iramoni gola ren.

Gola K’ito: Çamlixemşinişen arabate Çatişi gzaşen 2 saat’işa ninç’işinen. 2.400 m mağaloboni golaşa arabatenti, k’uçxetenti ilinen. Musafirobaşi tesisi do lok’ant’a koren.

Gola Eleviti-Tafteni: Xemşinişi vadiş jin, gola Çatişi k’vazaliş k’ele naqoneri 40 k’m gzaş k’ule ninç’işinen. Gola Paloviti, Troviti, Amlak’itişa na nulun arabapeti akşen golulun. 1.800 m mağaloboni golaşa monç’inoraş tutapes dido k’oçepe eşinç’enan.

Gola Samist’ali: 2.450 m mağaloboni golaşa hemi Ayderişi gzaşen hemiti gola Palovitişen ninç’işinen. Oxorepe muşiş dido mcveşi edo oxorepeş ok’idus xmareli kvapeşi sali steri do didi oqopinu golaşi xususobapeşen ren.