|
DUDMAXVENCE JİULİ ŞART'AVA
Jiuli Şart’ava dibadu 7 Mirk’ani 1944-s, Soxumis. İnjinerobaşi dip’loma na uğut’u Jiuli Şart’ava, 1992 3’anas Abxaziaşi Avt’onomiuri Resp’ublik’aş Meclisişi Dudmaxvence, 1993 3’anasti Abxaziaşi Avt’onomiuri Resp’ublik’aşi Oxen3aluri Dudmaxvance i3xunu. 27 St’aroşina 1993 tariğisti iqvilinu Abxazi milit’anepeşk’elen.
Abxazi milit’anepek Soxumis xe gedvesşi 27 St’aroşina 1993-s, Jiuli Şart’ava do Abxaziaşi Avt’onomiuri Resp’ublik’aşi Oktalobaş majura mak’aturepek (Guram Gabisk’iria, Raul Eşba (Abxazi), Mamia Alasania, Sumbat’ Saak’yan (Sumexi), Mişa K’ok’aia do majurape) var ik’abules omt’inu Soxumişen Okorturaşa. Edo iç’opines Abxazi milit’anepeşk’elen. İptinerot skidala mutepeşi şeni nena niçinu nati, Jiuli Şart’ava do k’abineşi majura mak’aturepe iqvilinu milit’anepeşk’elen. Ok’ont’aleri Na3iapeş rap’orişi toliten, Jiuli Şart’avak z’ireren monk’a şk’encepe. 2005-s, Amerik’anuri jurnalist’i Malcolm Lint’onik gon3’k’u ar merçapa Tbilisis. Lint’onik mo3’ires suretepe, limaşi oras yeşiğeri, Abxazias. Suretepes iz’irinu Jiuli Şart’avaşi ğureli xura, majura uşuroni xurapeş oşkendas. Milit’anepek Soxumis xe na gedves dğas yeşiğeri video filmepeşenti k’aixeşa iz’iren, muç’oti milit’anepeşk’elen Jiuli Şart’ava zoriten na gamiqoninu oktalobaşi binaşen gek’itxu do obaxuten. Ok’ule xolo zoriten ar k’amionişa kogeixunineren. Soxumişi gale mendiqoninu, Jiuli Şart’ava do oktalobaşi majura mak’aturepe, beciti p’ersoneli na iqvilinu svaşa. Emuşk’ule Jiuli Şart’avaşi uşuroni xura koniçinu Okorturaşa. Jiuli Şart’ava Senak’is kodixvinu. Jiuli Şart’ava ignapinu Okorturaşi na3ionaluri gurami 2004-s.
|
TÜRKÇE
