|
MAFOT'OGRAFE ARA GULER
Turkiaşi mafot’ografobaşi ust’apeşen ar teri na ren Ara Guleri dibadu 16 Mariaşina 1928 tariğis Mp’olis, Sumexi ar lavonişi bere oqopinot. Lises ik’itxupt’uşi, filmuri st’udiapes ixandu masinemobaşi k’arta speros. Rejisori do p’iesişi t’ekst’iş maç’arale oqopinu na unt’u şeni, Muhsin Ertuğrulişi teat’riş k’ursepes naqonu. 1950 3’anas, gazeta “Yeni İstanbul”is (“Ağani Mp’oli”) magazetobaşi dulyas kogeç’k’u. Artneri p’eriodis, Mp’olişi Universit’eşi Ek’onomiaşi Fak’ult’esti ik’itxu. 1958 3’anas, jurnalepe “Time-Life”, “Paris-Match” do “Der Stern”işi Xolosoni Yulvaşi fot’oş maambare iqu. 1961-s notamamu malimuri dulya. Jurnali “Hayat”is (“Skidala”) iqu timçxu, fot’ografişi k’ortaşa. Artneri p’eriodis ok’uiçinu Henri Cartier Bressoni k’ala; Paris Magnum Ajansişa ak’atu; İngilteres gamiçkvineri “Photography Annual”şi antologiak ognapu coxo muşi, kianaşi irişen k’ai şkvit mafot’ografepeşen ar teri oqopinot. Amerik’aşi Jurnaluri Mafot’ografepeşi K’erk’elişa mak’ature iqu.
1962-s, Germanias “Master of Leica”şi coxo mogu. Sviçres gamiçkvineri jurnali "Camera"k gamoçkvu doxmeli ar k’ore3xala ti muşişa. 1964 3’anas, Amerik’aşi Ok’ant’aleri Oxen3alepes Mariana Norisik na gamoçkvu "Young Turkey"is (Ağanmordale Turkia”) gamiçkvinu muşi fot’ografepe. 1967-s Jap’onias gamiçkvineri “Photography of the Vorld”coxoni antologias Richard Avedonişi fot’ografepe k’ala muşi fot’ografepeti gamiçkvinu. 1967 3’anas K’anadas Gon3’k’imeri "Adamepeşi kianaşa o3’k’omilupe" coxoni merçapas, 1968-s Nevyork’işi Modernuri Xeşnoxvenobaşi Galerias 3’opxineri "Peroni Fot’ografepeşi Viti Ust’a" coxoni merçapas, artneri 3’anas K’olnis Fot’ok’inaşi bazarobas xeşnoxvenepe muşi meirçinu. 1970-sti, "Turkei" coxoni fot’ografuri albumi muşi Germanias gamiçkvinu. Xeşnoxvenoba do xeşnoxvenobaşi mcveşoba temaloni fot’ografepe muşi ixmarinu Amerik’aşi Ok’ant’aleri Oxen3alepes “Time-Life”, “Horizon” do “Nevsveek”işi svaruli k’ortape do Sviçres “Skira” coxoni gamaçkvalaşk’elen. 1971 3’anas Lord Kinrossişi "Hagia-Sophia" (“Aiasofia”) coxoni svaraşi fot’ografepe yeşiğu. Xolo gamaçkvala “Skira”şk’elen, Picassoşi 90. dobadaşdğa şeni gamiçkvineri “Picasso Metamorphose et unite” coxoni svara şeni emuk’ala qu fot’o-rep’ort’aji.
1972 3’anas, P’arisişi Na3ionaluri Osvarales aqu merçapa. 1975-s, Amerik’aşi Ok’ant’aleri Oxen3alepeşa iç’andinu. Uk’orox3e çinoberi Amerik’urepeşi fot’ografepe yeşiğu. Ok’ule “Maeçkinde Amerik’urepe” coxoni merçapa muşi meirçinu kianaşi uk’oro3xe noğas. Artneri 3’anas, k’aravi zirxoni Yavuzişi opunçxoluşi temaloni “Guramişi Çodina” coxoni ar dok’umanuri filmi yeşiğu. 1979 3’anas Turkiaşi Magazetepeş Cemiet’işi fot’o maambarobaşi t’ot’is maartanobaşi p’rizi niçinu. 1980-s fot’ografepeşen namtinepe gamiçkvinu, Karacanik na gamoçkvu “Fot’ografepe” coxoni svaras. 1986-s Hurriyetişi Pondik na gamoçkvu, Prof. Abdullah Kuranişk’elen ç’areli "Mimar Sinanişi Svara"s yeşiğu fot’ografepe. Am svara gamiçkvinu, 1987-s, “İnstitute of Turkish Studies”şk’elen İnglisurot. 1989-s, gamiçkvinu Ara Gulerişi Masinemepeşi svara. 1991-s, Galeni Dulyapeşi Naziroba şeni, “Halikarnasişi Mençxome”şi (Cevat Şakir Kabaağaçli) "The Sixth Continent" coxoni svaras fot’ografepe yeşiğu.
Mtel kianas goxtu; fot’o-rep’ort’ajepe qu. Am fot’o-rep’ort’ajepe muşi Magnum Ajansişk’elen ignapinu mtel kianaşa. Vinston Churchill, İndira Gandi, John Berger, Bertrand Russel, Bill Brandt, Alfred Hitchcock, Ansel Adams, İmogen Cunningham, Salvador Dali, Picasso steri çinoberi şurepe k’ala rep’ort’ajepe qu, entepeşi fot’ografepe yeşiğu. İrişen çinoberi xvena muşi ren, mafot’ografepeşa p’oza na var meçapt’u, Picasso k’ala na qu rep’ort’aji. Jin muşi dido ginz’e 3’anapeş morgvalis na ixandu Mimar Sinaniş xvenapeşi fot’ografepe gamiçkvinu 1992-s Fransia, Amerik’aşi Ok’ant’aleri Oxen3alepe do İngilteres, “Sinan, Architect of Soliman the Magnificent” coxoten. Artneri 3’anas gamiçkvinu "Living in Turkey" coxoni svara muşi İngiltere, Amerik’aşi Ok’ant’aleri Oxen3alepe do Singap’uris “Turkish Style” coxoten, Fransiasti "Demeures Ottomanes de Turquie"coxoten. Fot’ografuri svarape muşi gamiçkvinu 1994-s “Mcveşi Mp’olişi Goşinepe", 1995-s "Ar P’eriodi Aşo Mek’ilu", "Gondineri Perepe do Nunk’upes Kiana". Ara Gulerişi fot’ografepe renan, P’arisişi Na3ionaluri Osvarales, Amerik’aşi Ok’ant’aleri Oxen3alepes Rochester Georg Eastmanişi Muzeumis, Nebrask’aşi Universit’eşi Sheldonişi K’olek3ias. K’olnişi “Mueseum Ludving'de Das İmaginare Photo Museum”isti meirçinen muşi fot’ografepe.
Muşi svarape: “Babilişk’ule Pskidaten” (1996); “Gondineri Perepe do Nunk’upes Kiana” (1995); “Gondineri Perepe” (1995); “Ar P’eriodi Aşo Mek’ilu, Na Skidunanpes Selami Voğada” (1994), “Mcveşi Mp’oluri Goşinepe” (1994); “Gondineri Mp’oluri Goşinepe” (1994); “Sinani: Didi Suleymanişi Mimari”, t’ekst’i: John Freely do Stephanos Yerasimos, (1992); “Turkias Oskidu”, t’ekst’i: Stephanos Yerasimos, (1992); “Demeures Ottomans de Turquie”, t’ekst’i: Stephanos Yerasimos (1992); “Maanşani K’ont’inent’i”, t’ekst’i: Halkarnas Balikçisi, (1991); “Ara Gulerişi Masinemepe” (1989); “Bedri Rahmi”, t’ekst’i: Prof. Abdullah Kuran (1987); “Fikret Mualla”, t’ekst’i: Turan Erol, (1984); “Fot’ografepe” (1980); “Harems” (1976); “Maeçkinde Amerik’urepe” (1975); “Hagia Sophia”, t’ekst’i: Lord Kinross (1972); “Turkei” (1970); “Topkapişi Sarayi - Sultanepeşi P’ort’repe” (1967); “Young Turkey”, t’ekst’i: Mariana Noris (1964); “Oster om Eufrat (“Firatişi Ekole”) (1960).
|
TÜRKÇE
