|
"DİDO NENONİ K'ANALİ" TRT 6-K OÇ'ANDİNAPS
Turkiaşi Radio T’elevizioniş K’idalaşi (TRT’) dido nenoni k’anali TRT 6-k oç’andinus kogeç’k’u. Oç’andinus Kurduri nenate na geç’k’u do ok’ule Arabuli, Farsuli steri nenapete iç’andinasunon yado na ignapinu TRT 6 k’analis k’arta ndğas, ar nena varna dialekt’ite p’rogramepe ixvenasunon. TRT’-şi dido nenoni k’analik; bereburi, ağanmordaluri, oxorcaluri, şursağoburi, ek’onomiuri, dramat’iuri, dok’ument’aruli, ist’oriuli, tabiat’uri, sp’ort’uli, musik’aluri, ambaruli, k’ult’uruli-xeşnoburi, religiur-axlak’uri do xeleburi p’rogramepete ma3’k’omilepeşi iri meşvenupeşi oxvenu noğiraps. Turkiaşi k’arta k’elen edo xolo İrak’i, İrani, Suria steri dobadonape k’ala Oşkenda Asiaşi dobadonapeşenti k’analis i3’k’omilen. “Turkiaşi xampoba do perepe ek’ranis o3’iru”şi noğiraten gei3’opxinu yado idia na ixvenen k’analis tudenç’ara umeç’areli iç’andinen.
Ofi3ialuri mak’amepek, k’arta dobadonamşine Turkiaşi mance ren, musavi hak’i do oxoşkva uğunan, mutepeşi k’ult’ura do çkvaneroba mskvaneburot oskedinu dvaç’irnan, k’analis çkvaneri nenape na ğarğalapan adamepeşi artikartiş oxo3’onuşi meç’irobape na oçodinasunon ç’andinaşi p’olit’ik’a aqvasunon, artoba do mteloba umosi ok’ap’et’inasunon ya tkumernan. P’luralist’i demok’rasi şeni na dvaç’irs temeluri ar hak’i meçamu, umosi t’oleransoni sosia o3’opxu şeni xampobapeşi gamopinu p’ozit’iuri ar xanda iqvasunon ya zop’onan.
26 Mbulora 2008 tariğis meriet’işa amaxtimeri, 5767 nomeroni Turkiaşi radio do t’elevionişi k’anoni k’ala radio do t’elevizionepeşi ge3’opxu do ç’andinapeşi k’anoniş gektiruşi k’anonite, Turkulişen met’a çkvaneri nena do dialekt’epeten ç’andinaşi selahiet’i na mogu do dudk’anoniş 133. maddeşi toliten, avt’onomia do ç’andinape muşişi uk’elenaroba esasi ren yado na ik’abulinen TRT-s, dido nenoni ç’andinaşi temas k’arta nenapeşa musavi nanç’inu dvaç’irs.
Noğarobaşi on3’eli do k’ult’urapeşi mozaik’a na ren Anatolias dido nenoni oç’andinuşi meç’iroba tolişen ugo3’omt’ineri, Oşkenda Asia, Oşkenda Yulva, K’avk’asia do Balk’ania steri mçire şumuloni regionaluri ç’andinaş oxvenu uk’ors. Mesela TRT Turk coxoni k’analis; Azeruli, Turkmenuri, Ozbek’uri, K’azak’uri, K’irgizuri, Tataruli, Uyguruli steri nenapete, TRT 6 coxoni k’analis; Kurmancuri, Zazuri, Arabuli, Farsuli, Suryanuri steri nenapete, TRT 7 coxoni k’analis; Lazuri, Kortuli, Abazuri, Adiğuri, Oseturi, Çaçanuri steri nenapete, TRT 8 coxoni k’analis; Albanuri, Boşnak’uri, Pomak’uri, Gagauzuri, Romanuri steri nenapete oç’anduşi p’rogramepe oxvenu unon.
|
TÜRKÇE
