|
PAZAR: KİANAŞİ İRİŞEN NAT'URALİ PURO
Pazariş puroş tutumi arçkva gondunu yado vicert’itşi muşebura morçi na niçanu tutumiş nergik eçi 3’aneri gonç’ela çkini domiçodines na tku Talvati coxoni op’ut’eşi muxtarik, "Nik’arbu yado miçkit’es mara go3’os ar manz’ageri çkinişi nek’na muşis 3’oxle muşebura ar tutumişi nergik morçi niçanu. Çkini manz’agerik nergi k’aiten ordu, ok’ule oxominu do xes na aqu ç’k’emepe ma momçu. Mati am 3’anas em ç’k’emepe vorgi do nergi çkini irdu. Am nergişen vit oput’eşa dobağineri ç’k’emi kogamulun. Ma am nergepe golaxtimeri 3’anapeşen na domiskidu gonç’ela şeni vorgi. A3’i antepe mitik va orgaps do varti eç’opups do gamaçaps. Mara mxuci niças do gamaçamu şeni p’iasa iz’iras na xolo çinoberi Pazariş puroş tutumi ik’orobinen." yado ğarğalu.
"Pazariş puroş tutumişi mtel kianas na igorinen ar mzguda oqopinuşi dudsebebi nat’uraloba muşi ren." na tku muxtarik, "Çkini tutumişa çkar mutu var int’alen mara mağali k’alit’e aqven. Havanaşi tutumişa peri aqvas yado çisti uk’atapan. Aşo oxvenu tutumişi nostoni ok’oxups do k’alit’e muşi dork’inaps. Kianas a3’i puroşi tutumi arxvala Kubas irgen. Çkinti tutumi margan na kianas balan3ia iqvasunon do kianaşi bazarepes çkini tutumişi k’alit’e vo3’iratminonan. Amuş sebebiten Pazariş puroş tutumi margan na noğa çkinişi coxo xolo mtel kianas ignapinasunon do ek’onomiurot çai k’ala na molişinen Riziniş ek’onomiaşa mxuci meçasunon.” ya tku.
Dido k’ai orgapa na iqvet’u orapes na var oxoma3’ones sebebiten memağes na tku muxtarik, " Meksik’uri cinci na uğun do mtel kianaşi irişen k’ai na ren puroşi tutumişen noxvene çkini purok, “Pazar” coxoten Avrop’a do Amerik’aşi noğapes gamiçinet’u. Mteli mutxani k’ai ulurt’uşi uoxo3’onale ar devleturi polit’ik’aten tutumi çkinis gza nik’vatinu. Edo na dvaç’iren zirauri mxuci do k’ai ar pasiti var niçinu do çinoberi tutumi çkini tamo tamo meğuru. Matutumepek meç’irobas dido var naxondines. Zararoni 3xvorepe var ağurineşşi tutumik geç’areli var mogapu do tutumi orguşi dulyape koniçodu." ya tku.
Muxtarik nenape muşi aşo oçodinu: "Golaxtimeri orapes çaişi parak ndğaleroni ç’ireba çkini oçodinapt’u mara tutumişi para imoskedinert’u do işinaxet’u. A3’i tutumi nik’arbu do çaişi parati mutus var nirgen. Ğoman 500 m2 dixas na irgen tutumişi para, andğa 10 dek’ari çaepunaşen var moigen. Çkini raionis ziraat’i oxvenuşi let’ape dido na var ren şeni ğirsi mağali do monk’a na uğun mzgudape orgu unon. Emuşeni dulyaşk’oçepek am sakvarepeşa ar xe gedvan yado vizmon."
|
TÜRKÇE
