|
LANDEŞİ NCA DU3XU
Du3xu, Tilia do qinoras but’k’a na dobğaps 30 k’onari nca varna ncap’inaşi cinsiş oşkendari coxo ren. Ginz’enoba muşi yinç’en 20- 30 met’roşa. Didinoba muşi 5 sm-şen 10 sm-şakis na iqven but’k’ape uğun. But’k’ape muşi ren generalurot gurişi formas do ğula, kinarepe muşi k’ibironi do ginz’e çaloni. Muşi gek’ideri pukirepes uğun skit’aluri peri do xoşi şura. Dido yano (Mbulora- X3alaş tutapes) na guin3’k’en am pukirepe ixominen do çai steri işven.
Mskva şuryani pukirepe uğun. Am sebebiten, landeşi nca oqopinot imralen. Xçe, çorçi do k’imet’oni pi3ari uğun. Didopeten na igoren ncalepeşen ren marangozobas. Du3xuş t’k’ebis na uğun lifepe ixmaren toki do şverepes. Pukiri muşiti ixmaren medi3inas. Du3xuşi çai ren maslebine, mseli ma3’k’ale do xvali ma3’k’ale. Du3xuşi pukirite obonuti ren maslebine. Turkias uğun sumi sort’i: Tilia platyphyllos (Didi but’k’oni du3xu), Tilia rubra (K’avk’asiaşi du3xu), Tilia tomentosa (Xarçxilişi du3xu).
Oşkenda Avrop’aşi obargalepes uğut’u uk’ore3xu du3xu dido mcveşi 3’anapeş 3’oxle. Geladgit’u şkaguris. Xalk’ik na ok’oik’atet’u svas rt’u. Amuşen çkva, du3xu na geladgit’u svas xalk’ik ambari meçapt’u artikartişa do ambari ognapt’u artikartişen. Uçilu ağanmordale k’ulanepek ekonaşis o3’irapt’es ti mutepeşi. Pukrik’aşi dudis dansişi fest’ivalepe ixvenet’u am ncaşi tude. Oput’uri maxkemepe xolo akonaşis geidginet’u. Am sebebiten, du3xu içkinen maxkemeşi nca varna maxkemeşi du3xu coxotenti. Du3xu ren Ğormoturi, Germanuri do Slavuri k’ult’urapes.
|
TÜRKÇE
