|
DUDNAZİRİ NECMETTİN ERBAKAN
Necmettin Erbakani dibadu 29 Gimua 1926 tariğis Sinop’is. Muşi baba ren hakimi Memet Sabri Begi, nana muşiti Kamer Xanumi. Baba muşişi cinci ren Kozani. Necmettin Erbakanik kogeç’k’u iptineri doguronis K’ayseris, baba muşişi tayiniş sebebite doçodinu T’amt’ras. Ok’açxeti Mp’olişi Biç’uri Lise doçodinu. Mp’olişi T’eknik’aş Universit’eşi Makinaş Fak’ult’eşen dimezunu 1954-s. İqu manuşvale mot’orişi kursişa. Mendiçkvinu Germaniaşa 1951 universit’eş k’elen. Qu dokt’ora Aachenişi T’eknik’aş Universit’es. Germanuri armia şeni goşogorus na rt’u DVL Goşogorobaşi Şkaguronis ixandu P’rofesor Dokt’or Schmidti k’ala. 1953-s goiktu Mp’olişa do3ent’obaşi 3adalas amaxtimuşa. 1954-s iqu do3ent’i Mp’olişi T’eknik’aş Universit’es. Xolo idu Federaluri Germaniaşi fabrik’a Deutzişa. Leopardi coxoni t’ank’epeşi ok’ap’et’inuşi odulyobas misia aqu emus goşogoruli dudincinerot (1951- 1954). Mburora 1954- 1955 3’anapeş şkas notamamu malimuri odulyoba. 1956- 1963 3’anapeş şkas 200 oşkandaroni sotinuri mot’ori na omralasunt’u “Gumuş Motori” do3’opxu. İqu p’rofesori 1965-s. İ3xunu generaluri mdivani Turkiaşi Odape do Borsapeşi K’omisiaşa 1967-s; diçilu Nermin Xanumi k’ala.
1969-s, unt’u oqopumu namzeti mebusi P’art’ia Adalet’işen. Emus gza geiğobinu Suleyman Demireliş k’elen. Timoşletineri namzeti iqu K’onyaşen. İ3xunu mebusi. 1970-s gedgu P’art’ia Milli Nizami. P’art’ia geink’ilu dudk’anonişi mahkemeş k’elen. 1973-s gedgu P’art’ia Milli Selameti. İqu manuşvale dudnazirişa, 1974- 1978 3’anapeşi p’eriodis sum çkvadoçkva k’oali3iaşi xe3alas. 1973 3’anaşi 3xunas P’art’ia Milli Selametis aqu 48 mebusi. K’un3’ula K’ip’risis mtelot xe gedvinus numxvacu. 17 3’ilva 1974-s goşibğu k’oali3iuri xe3ala. 1977 3’anaşi 3xunas, P’art’ia Milli Selametis aqu 24 mebusi.
6 St’aroşina 1980-s, K’onyas P’art’ia Milli Selametik na 3’opxu K’udusişa numxvacuşi mit’ingis k’abğa yeçkindu. Edo aya işinu 12 St’aroşinaşi sebebepeş art-arti. 12 St’aroşinaşi p’eriodis eya rt’u toliştude İzmir-Uzunadas arm3ika vaxitis. 15 Gimua 1980-s itevkifinu. 24 Xe3ala 1981-s nişkvinu do diberaatinu. 1982 3’anaşi dudk’anonişi hukmite imemninu p’olit’ik’aşen vit 3’anaş morgvalis. 1987-s 3’opxineri referandumite goiktu p’olit’ik’aşa. İqu generaluri dudmaxvance 19 X3ala 1983-s gedgeri P’art’ia Refahişa. İ3xunu mebusi K’onyaşen 1991 3’anaşi 3xunas.
P’artia Refahi iqu maartani, 158 mebusite 1995 3’anaşi 3xunas. Gedgu Refahyol-işi xe3ala DYP k’ala artot. Necmettin Erbakani iqu Dudnaziri 28 Mbulora 1996-s. 28 K’undura 1997 tariğoni MGK-s gonk’vaterepe do ok’açxeti skideri 28 K’unduraşi p’ro3esik nusebebu Necmettin Erbakanis meşkvinu dudnazirobaşi misia, 18 Mbulora 1997-s. RP geink’ilu. Mak’idale muşi na rt’u K’ank’ala Milli Goruş jur k’eles ok’oi3k’uşi 2001-s, Erbakanikti numxvacupt’u Milli Goruşiş K’elenarepek na k’ides P’art’ia Saadeti, Recai Kutanişi go3’oncğonerobate. Ti muşi şeni na guin3’k’u gondineri trilyonepeşi davas “muşiuri kart’alis masaxteroba” iz’irinu k’abaxat’oni mara, niçineri ceza dido badi na rt’u şeni oxoris moloxunuşa guiktinu. 2008-sti oxoris moloxunoba ixarsuvinu p’rezident’i Abdullah Guliş k’elen. Uk’ore3xu svaras xeşç’ara na gedvu Necmettin Erbakani ren çileri do sum bereşi baba. Emus uçkin İnglisuri do Germanuri nenape.
|
TÜRKÇE
