DUDBUT'K'A

K'AVK'ASİAŞİ İSLAMURİ EMİROBA

Çeçen İçkeriaşi Resp’ublik’aş (ÇİR) p’rezident’i Dokka Umarovik, Gimua 2007-s na ignapinu serialuri k’ararnamete Caxar Dudayevişi go3’oncğonerobas, SSRA-şi goşobğinuş k’ule na geidginu do xalk’işi reyepete dudk’anoneri na niktu ÇİR doçodinu. Umarovik imza na geç’aru k’ararnamepete, Çeçen İçkeriaşi xe3ala do p’arlament’o kogoşobğu. Umarovik na meçu oxo3’onapas; K’avk’asiuri xalk’epek 300 3’anaşen doni Rusepe k’ala icedelenan ya, Rusepe ok’optat na gemacginenan ya, Avrop’a do Rusiaşi gebaz’gapeşa medginu şeni k’arta Muslimanis ağani oxen3ales ok’oxtimu dvaç’irs ya, ayati İslamişi k’anonepete gedgimeri İslamuri Emirobate maxvenenan ya tku. Edoxolo, İslamuri Emiroba vilayetepeşen i3’opxinasen ya, majura k’ele na ok’oxtes k’arta Cemaatişi Artobapek Olande K’avk’asiaşi irsoti “limaşi dixa” yado ognapes ya, amuşk’ule Rusiaşi Federasioni k’ala İsraeli, İnglisia do AOO-ti mt’eri yado vik’abulaten yado noqonu. “K’avk’asiaşi İslamuri Emirobaşi Emiri Ebu Osman” yado unvani na ixmaru Umarovik na geç’aru k’ararnamepe aşo ren:

K’avk’asiaşi İslamuri Emiroba (K’İE) do Emirobaşi doloxe Vilayetişi Valinobapeş o3’opxu, Çeçen İçkeriaşi Resp’ublik’a, K’İE-şi Noxçiyço (İçkeria) vilayetişa noktinu do K’İE-şi doloxe Dağistanişi Vilayeti, Noxçiyçoşi (İçkeria) Vilayeti, Galgayçoşi (İnguşia) Vilayeti, İristonişi (Osetia) Vilayeti, Nogay Bozk’irişi Vilayeti, K’abardey, Balkar do K’araçayişi Ok’oxtimeri Vilayetiş gedgimu, K’İE-şi Vilayetepeş Dudmaxvencobaşi K’onseiş otesisu, ÇİR-şi Nazirobaşi K’omite k’ala P’rezident’obaşi goşobğinu, ÇİR-şi coxote k’ortaşi şeriaturi k’anonepete oktalu, galeni oxen3alepes Çeçen İçkeria na otemsilups k’oçepeşi K’İE-şi matemsilot oxandinus noqonu, galeni oxen3alepes K’İE na otemsilups xususi matemsilepeş vekaletnamepeşi otasdik’u do K’İE-şi galeni oxen3alepeşi dudari matemsilot Umar Dakaevişi otayinu.

Osmanuri Oxen3aleş K’avk’asiaşen gamaxtimu k’ala na geoç’k’u p’roblemepe andğaşakis çkar var içodu. Rusepeş k’elen K’avk’asiaşi xalk’epeşa na itatbik’inu uçvaşi p’olit’ik’ak, Armenepek na qu zulmepek, Kortupeşi Kartvelist’uri mebaz’gapek K’avk’asias di3xiri do çilamure dobuşa nusebebu. Rusiaşi Çarobaş K’avk’asiaşi xalk’epeş oçvu, genomskide k’oçepeşi oğurinu, Rusiaşi Federasionişi k’atliamepete na yedgitu oxoşkvaşi k’ank’alape xvala K’avk’asiurepeş k’elen vardo çkvadoçkva Muslimani dobadonapeşen monoxtime k’oçepeş k’elen ixor3elinen. Edoxolo Muslimanobaşa amaxtimeri k’oçepekti, 3’oxle İnglisepek cihadişa meşvelu şeni K’avk’asiaşa na idesti içkinen. Rusepe k’ala na ixvenu mo3’qvaşi ok’oğarğalaş faide umeçamuk, K’avk’asiaşi irsotis yedgitu kogoşogzu do çodinas artikartişen çkvaneri na iktalen mucaxidepeş ok’onç’inute K’avk’asiaşi İslamuri Emiroba i3’opxinu. Na miçkinan steri, “K’avk’asiaşi İslamuri Emiroba”-şi tema, Şeyx Şamilişi p’eriodisti isimadineret’u do İçkeriaşa “K’avk’asiaşi Ok’oxtimeri Emiroba” coxo meçamu ip’laneret’u. Mara Rusepe k’ala na ixvenet’u cixadis cephepe moinz’inuşi tema muşebura itehirineret’u.



                                                                                                                                                              TÜRKÇE