|
ZABUNOBAŞİ MAAMBARE NÇAMİNİ
Nçamini ren onçaminuşi arzu na yoçkindaps hisi. Nçamini k’oçis dido uraxat’oba meçaps. Şiddetoni iqvaşi uncirobaşa, st’resişa do dep’resionişa nusebebups. Nçaminişi mtini sebebi var içkinen. T’k’ebişi xuçepe itesirinaşi do histamini coxoni kimialuri madde dobaşi kunis nçaminişi hisi yoçkindaps. Nçamini bazi t’k’ebişi ar zabunoba k’ala iz’iren do baziti doloxeni ar zabunobaşi nişani iqopen. Doloxeni zabunoba na var omç’un majura nçaminoni zabunepes nçaminişi sebebi psikologiuri iqopen.
Nçaminik dido uxarat’oba na meçaps t’k’ebişi zabunobape iz’iren. Misali k’urdeşeni, suçiçeği do egzemas nçamini iqven. Namtini t’k’ebişi zabunobapes ker3ela uqopineri nçamini iqven. Didi 3’anerepes na iz’iren xomula t’k’ebişen nusebebe nçamini ren aşo ar misali. Aşo nçaminis xususurot qinoras manz’inen do t’k’ebis çkva nişaniti var o3’iraps. Nçaminişi sebebi generalurot xomula t’k’ebi rentina bazi doloxeni zabunobati iqopen. T’k’ebis msora steri namtini parazit’uri zabunobapesti nçamini dido iqven. Dermatologiaşi maçkinalepek am zabunobape muayenete perpot oteşhisapan. Egere simadi inçaminen na k’anserişa noktinuşi nişani iqopen. Am xalis oteşhisu şeni biopsi oxvenu dvaç’irs.
Nçaminişa sebebi na iqven doloxeni dido zabunoba ren. İrişen dido na muixvadinen dirk’uşi udobağinobaşen yoçkinde nçamini ren. Hep’at’it C-ti na iz’iren uçapurpuşi zabunobape do guat’iriti nçaminişi sebebepeşen art-arti ren. Erk’inaşi udork’inoba, p’olistemia vera do multibili myeloma steri di3xirişi zabunobapesti nçamini iqven. Namtinoras lenfomapesti nçamini yeçkindun. Nuzuli steri norologiuri xalepesti nçamini iqopen. Nçaminişi sebebepe t’k’ebişi k’un3xineri k’ont’rolite, di3xirişi t’estite edo xolo biopsite itespitinen. Egere nçamini egzema varna k’urdeşenişen yeçkindun na am zabunobapeşi oşvelu nçamini oçodinaps. Egere nçamini doloxeni zabunobaşen yeçkindun na nçamini ok’auşi xap’epe do ult’ravioleşi şvela iprat’ik’en. Nçaminis dido sebebi uğuntina şvela muşis ar-jur metodi uğun. Maartanot t’u3a 3’k’arite var iboninasunon. Çorçi do titxu dolokunepek do çuçuna sotik nçamini om3ikanaps. Sap’onepek t’k’ebi tkvani oxominaps edo emuşeni otesironi t’k’ebepe şeni moxva sap’onepe ixmarit. Obonales k’ai ibonit do xura tkvanis sap’oni var dogiskidan. Obonaleşen gamaxtatşi 2- 3 deik’eş doloxe t’k’ebi na onemonaps merhemepe ixmarit. Suçiçeği do bombolaşi geak’ibinuşen yeçkindineri 3’k’aroni cğobişi zabunobapes k’alamini na uğun losionepe k’ai muxteps.
|
TÜRKÇE
