|
YEMBUZ'ĞİNALE ASLAN MASXADOV
Aslan Masxadov 21 St’aroşina 1951-s Çeçeni xalk’i mtelot na içvinu K’azakistanis dibadu. 1957 3’anas, anşi 3’aneri rt’uşi ocaği muşi Çeçenistanişa uk’uniktu. 1972 3’anas Tbilisişi Askeruli Matope Ak’ademiaşen imezunu. Rusiaşi Federasioniş namtini k’ortape k’ala Hungaria do Lit’vanias misia aqu. Mç’ita armias matope miralayişi rutbeşakis na nunç’uşu Masxadov, SSRA goşibğuş k’ule armiaşen kogamaxtu.
1993 3’anas timoşletinobaşi lima na meçapt’u Çeçenistanişi dudgenerali iqu. 1996 3’anas didot na içodu Rusi- Çeçenepeşi maartani limaş moginus didi roli aqu yado ik’abulen. 1996-s Mosk’ovaşi xe3ala k’ala Çeçenistanişi oktalaş şkas na ixor3elinu akt’ite dobadonaşi timoşletinoba Rusiaş k’elen ofisialuri oçinuş k’ule na geidginu oraloni xe3alaşi Dudnaziri iqu. Timoşletineri Çeçenistanişi maartani p’rezident’i Caxar Dudayevi xainobate işehidinuş k’ule ağani p’rezident’iş o3xunu şeni 27 3’anağani 1997-s na ixvenu 3xunas Masxadov reyepeşi nanç’inerot %60 mogu do majurani t’urişa udvaç’iro kogecginu do Çeçenistanişi p’rezident’i iqu.
P’rezident’obaşa i3xunuş k’ule na meçu oxo3’onapas, Çeçenistanişi timoşletinoba Rusia k’ala muzakere var p’aminonan ya tku do kianaşi dobadonape Çeçenistanişi ofisialuri oçinuşa uç’andu. Majura namzetepek gecgina muşişa çkar itirazi var qves do go3’oncğoneroba muşi k’ala dobadonaşi xali on3’uranu şeni mutepeşişen na ik’vandinasunon k’arta mutxa oxvenuşa xaziri voret ya tkves. Aslan Masxadov 12 K’undura 1997 3’anas K’uranişi jin yemini qu do p’rezident’obaşa kogeç’k’u. 1999-s Mosk’ovaşi oktalak k’abuli xveneri akt’i na mejilu do Çeçenistanişa xe na gedvu şeni Masxadovişi p’rezident’obaş p’eriodis Rusi- Çeçenepeşi majurani lima keçkindu. Emuşeni emuk hemi p’rezident’ot hemiti cixadişi go3’oncğonerot misia muşis naqonu. Am sebebite t’axtis vardo cepes rt’u. K’arta meç’irobas nuxondu do nosiyari metodite ok’vak’idus naqonu.
Masxadovişi Çeçenistaniş p’rezident’obaşi misia 2001 3’anas diçodu. Mara am 3’anaş k’ule majurani limaşi sebebite 3xuna na var ixvenu şeni vazifes mevaqonop yado idia qu tina Rusiaşi xe3alak am idia k’abuli var qu. Masxadov 8 Mirk’ani 2005 tariğis, Rusi Spetnaz k’omandopek T’olstoy- Yurtis na qves op’erasionis majura Çeçeni k’umandanepe k’ala işehidinu. Çili muşi Kusma, k’ulani muşi Fatma do biç’i muşi Anzor umiteli kodoskidu.
|
TÜRKÇE
