DUDBUT'K'A

MT'K'AEPE MT'UT'A İQVEN

Turketis mt’k’aşi oç’vape var idodgitinen. Sezonuri normalobapeşi jin na extimeri ren t’u3a t’aronepe, becitoba var o3’iramu do sabot’ajişi sebebepeten mt’k’aepe çkini mt’ut’a iqven.

Antalyaşi Kaş coxoni noğas na geiç’k’u oç’va var inoskirinu. Muğlaşi Bodrum coxoni noğas na geiç’k’u oç’vati k’ont’roli var ixvenen. Oç’vape na manz’inu şeni p’oli3iak sabot’ajişi albatobaş jin ixandeps.

Antalyaşi Kaş coxoni noğaşa mek’ireli Kemer coxoni op’ut’eşi oçildres na ren Kibrisişi ğalişi k’anionis na gamaxtu oç’va omçiranuten naqonen. Mt’k’aşi oç’vak, em t’erit’oriaşi mt’k’uroni skidalasti zarari meçu, mt’k’uri txaepe do mskverepeti na uğut’es obğe mutepeşi naşkves do oskedinu şeni gza gorupan. Oç’vak, zarari na meçu dixa 500 hekt’arişen umosi ren yado itku.

Bodrumis, nanç’ineri 700 hekt’aroni ncaepunas zarari na meçu oç’va k’ont’roli var ixvenen. Bodrumişi Mumcular coxoni raionis na gamaxtu oç’vaşk’ule, t’erit’orias na ren Mazi do Çocukmezari coxoni oput’epes, ixişi k’ap’et’i obaruşi sebebiten na irdu oç’va skidalaşi svalapesti otexdit’inus kogyoç’k’u. Bodrumis na gamaxtu mt’k’aşi oç’vaş, xaçkaşi dixape do topurişi boginape t’axribi na aqves dobadonamşinepeşi zarari oxo3’onu şeni ofi3ialuri dulyapeşa geiç’k’inu.

Selçukişi Bulbulişi germaşi p’icis na geiç’k’u do Kuşadasişi Pilav coxoni germaşa na nunç’işu oç’vaşk’ule, Kuşadasişi t’erit’orias oqinapuşi dulyapeşa niqoninen.

Çanakkaleşi Ayvacik coxoni noğas, xuti çkvaneri svas geiç’k’u yado na oxoi3’onu oç’va, oç’vaşk’oçepeşi nodgitinuten var irdaşakis inoskirinu.

Aydinişi Nazilli coxoni noğas, jur çkvaneri svas na gamaxtu oç’vas, tot’ali oqopinot 61 hekt’ari dixa diç’u. Kocakesik coxoni oput’eşi Kunepe coxoni maxalles na gamaxtu oç’vas 1 hekt’aroni mt’k’aepuna do Haskoyişi Sinekçiler maxallesti 40 hekt’aroni mt’k’aepuna do 20 hekt’aroni ç’uburişi dixa diç’u yado ignapinu.

Adanaşi Yureğir coxoni noğaşi mt’k’aepunas na gamaxtu oç’va k’ont’roli dixvenu. Am noğaşa mek’ireli Eyci Uşaği do Hocali coxoni oput’epeşi sinorepeş doloxe na ren txomepunas na gamaxtu oç’va ixişi sebebiten mçire dixapeşa amağzu. Oç’vas, maartani o3’k’omiluşi toliten 100 hekt’aroni txomepuna ditaxrip’u, oqinapuşi xandapeşe niqoninen.

Manisaşi Soma coxoni noğaşi Naldoken coxoni oput’eşi xolos na gamaxtu oç’vas nanç’ineri 13 hekt’aroni mt’k’aepuna dit’axrip’u. Oqinapuşi dulyape ixvenen.

Kutahyaşi Simav coxoni noğas na gamaxtu oç’vas 5 hekt’aroni mt’k’aepuna zarari z’iru. Kalkan coxoni ç’it’anoğaşi Beşiktepe coxoni t’erit’orias, a3’işen na var oxoi3’onu ar sebebiten na geiç’k’u oç’vaşa, 4 arrosozi, 6 oç’vaş mankana, 3 kepçe do ar dozeriten imudaxelinu.