|
OT'OKT'ONİ NENA DARGULİ
Darguli (Dargan mez), Olandeyulva K’avk’asiuri nenapeşen ar teri ren do Nax-Dağistan grup’işi Lak-Dargi şubeş doloxe işinen. Dağistanişi Resp’ublik’aş ot’okt’onot irişen dido na iğarğalen majurani nena Dargulişi, xolosi mzaxali nena Lakuri ren. Darguli; Avar-Andi-Dido do Lezgi tuden grup’epeşa oşkari cincite mek’ireli ren. Darguli nenati doloxe muşis na ren Olandeyulva K’avk’asiuri nenapeşi cinci şeni, tarixuri Oşkayulvas mçire dixas dobargeri Hurri-Urartuepek na ğarğalapt’es çkvadoçkva k’abilepeşi namtini dialekt’epe ren yado isimadinen.
Dargepek mutepe şeni Xuruk ya icoxopan do Dağistanişi Resp’ublik’as 516.000 k’oçi maxoroba uğunan. Majura mcveşi Sovieturi dixapes na skidunanpe k’ala mteli 680.000 k’oçiş k’elen nananena yado iğarğalen. Am k’oro3xaşa 19. oş3’anuras K’avk’asia-Rusiaşi limapeş oras dobadona mutepeşi naşkves do Turkia, Suria, Urduni, İrak’i, İrani do majura terepeşa na dibargespeti ik’atinaşi kianas 730.000 Dargi skidun ya domatkvenan. Turkias, Darguli nananena yado; Yalova, Sivas, Tokat, Hatay, Mp’oli, Ank’ara steri noğapes iğarğalen.
Darguli, Dağistanişi medresepes 15. oş3’anuras Arabuli albonite iç’arinu mara dido na var ixmarinu komiçkinan. Sovieturi Artoba geidginuşi 1926-s Arabuli albonite ağanuri i3’opxinu mara 1937-ş k’ule K’iriluri albonite oç’arus geiç’k’inu. Darguli albonis 47 bonca uğun. Darguli nenas Cudaxar, Akuşa/Uraxa, Xaydag, Kubaçi, Dejbug, Xarbug, Muirin, Sirxin yado ovro dialekt’i uğun. Akuşa/Uraxa ofisialuri dialekt’i yado iğarğalen do iç’aren.
|
TÜRKÇE
