|
ÇEÇENEPEŞİ NODGİTAŞ TARİXİ
Rusi kafirepeşa ginz’e 3’anapeşen doni timoşletinerobaşi k’abğa na meçaps Çeçeni xalk’işi nodgitaş tarixi na oxo3’onapaps svara, Anka Gamaçkumalaş k’elen 2005 3’anas Mp’olis gamiçkvinu. Çeçenepeşi timoşletinerobaş k’abğapeşi temas a3’işakis na iç’aru irişen beciti xanda na ren “Çeçenepeşi Nodgitaş Tarixi”-şi maç’are, çinaperi filologi do Çeçenistanişi Çkinapeş Ak’ademiaşi şerefoni mak’ature Tarik Cemal Kutlu, skidala muşi na okadu didi svaraş oç’aru na oçodinu oraşen ar-jur tutaş k’ule doğuru.
Svaras, Çeçeni xalk’işi timoşletinerobaş k’abğaşen anane do adetepeşa edoxolo Çeçenuri albonişakis dido tema k’aixeşa do ilmiuri iç’arineren. Svarak, Çeçenepeşi nodgitaş tarixi arxvala nodgitaşi tarixi vardo Çeçeni xalk’işi generaluri do nasionaluri tarixi yado oxomo3’onapapan. Edoxolo Çeçenepeşi, K’avk’asiaş dixapes na qves aktivit’epe, rolepe, cinci, k’avimuri şecere, go3’oncğonerepe, çkva xalk’epe k’ala munasebet’epe, dobadona mutepeşis na nat’k’va3en duşmanepeşa oş3’anurapeşen doni na ikipan nodgitape, xampa odudepete eşiç’arineren.
Tarik Cemal Kutluk, Turkiaşi xalk’epeşa Çeçenepe, tarixi mutepeşite oçinapu noiğineren do Çeçenepeşi na içkinen irişen mcveşi orapeşen molaşineren. Svaras, m3ika maxoroba na uğun Çeçeni xalk’ik otxo k’eleşen na gvak’iru agresiuri k’avmepeşa na nodgiteren do p’olit’ik’uri, k’ult’uruli do sosialuri tarixi mutepeşi var aç’areren edo tarixi oç’aru vardo oskedinuşa noiç’ineren yado tema uğun. Çeçenepeşi timoşletinerobaş nodgitaşa onç’eloni mitxanepe şeni dido k’ai noç’are ren do Çeçenepeşi Osmaniaşi oxen3ale k’ala munasebet’epe na goşogorinen arteri svara ren. Raxmet’oni Kutluk, svaras Çeçenuri-Rusuli-Turkuli alboniti kogedveren.
Numçinuşi nomera: 0212 514 53 54
|
TÜRKÇE
