DUDBUT'K'A

VİT T'RİK'ONİ Ç'AĞANA

Ç’ağana ren vitt’rik’onarepeşi (Decapoda) t’akimişen. Ç’ağana ren oşkari coxo, namupek na 3’opxupan Brachyura infra t’akimişi xeç’ep’oni sort’epe. Emus uğun dido mk’ule k’udeli. Muşi korba ren gurp’icişi tudenk’ele. Emus uğun ekseri dido mçxu iskelet’i. T’k’ubi gorçak’oni uğun. Ç’ağana skidun k’ianaşi mtel ok’ianusepes. Loqa3’k’ari do dixas na skidun uk’oro3xe sort’epe muşiti iz’iren. Ç’ağanapeşi ginz’enoba ren çkvadoçkva. Par3ulişi ç’ağana ren ar-jur milimet’re. Jap’oniaşi ç’ağanaş ar t’rik’i ren otxo met’re k’onari. Ç’ağanas uğun xut t’qubi t’rik’i. İptineri t’rik’i muşi t’qubi gorçak’onite 3’opxineri ren. Am gorçak’onepe oxonk’anu şeni var ixmars. Ar-jur sort’i muşişen gale, korba muşi uğun dudgurp’iciş tudenk’ele.

Ç’ağanapek gulunan elakteri. T’rik’epe muşi indrik’en arxvala ğuli k’eleşa. Adale muşikti ixandeps tito-t’qubi. Am adalepeşen art-artik zdips t’rik’i. Dudişen oginz’anu şeni, ant’agonist’uri arçkva adaleşi oxandu dvaç’irs. Aşo goxtimus 3’k’arişi p’eçinoba k’ala alak’a uğun. 3’k’ari ren nanç’inerot 830 fara p’eci havaşen. O3’k’arobati ren 60 fara dido havaşen. Amukti mo3’irapan, 3’k’aris na skidunan şuronepes mamxvace iskelet’i var uk’ors, dixas na skidun şuronepe k’onari. Am sebebite, didi bombulaş ç’ağanas var dvadginen 3’k’ariş gale, komelaps. Dido ç’ağanak o3’iraps aşikari seksualuri dimorfizmi. Seksualoba mutepeşi içkvaneren perpot. Gurp’iciş tudenk’ele korba, kimolis umosi umçire uğun. 3’unapes am mesafe umosi mçire uğunan. Aya ren taseri markvali 3’una ç’ağanak na tirups şeni.

Ç’ağana ren ar k’ele tipinari do majura k’eleti xor3inari. Ekseri 3’k’ariş ğvelepete skidun. Amuşen ekole; çkvadoçkva sort’epek imxornan çiçkunarepe, 3’i3’epe, majura xeç’ep’onepe, markvalape, bakt’eriape do tortupe steri majura mgvanapeti. Ç’ağanape şeni, mzgudanuri do skindinaluri mgvanaten oxokteri oskedinu ren doç’ironi, manişa omordu do moxva xuraşi mance oqopinu şeni. Nanç’inerot 850 sort’i ç’ağana ren loqa 3’k’arişi varna gverdi dixaluri sort’işen. Ç’ağanapek skidunan kianaşi t’rop’ik’uri do gverdi t’rop’ik’uri k’ortapes.



                                                                                                                                                              TÜRKÇE