|
GOŞOGZERİ İNK'İP'AZOBA
İnk’ip’azoba yani konstipasyon, mç’uşi aksionepeş normalişen om3ikanuş xali ren. İnk’ip’azoba, hekimişa irişen dido na ilinen zabunobapeşen arteri ren. Ekseri moçkva 3’anerepes iz’irennati xalk’işi k’arta mitxanepes notesiraps. Oxorcalepes kimolepeşen 2- 3 fara çkva ağoden. Namtini mitxanepeş dğaluri oz’gu, çkvaneri mitxanepeş dolonuri oz’gu k’onari iqopen. İnk’ip’azobaş oxo3’onuşi nişani, muk’o fara na iz’gven vardo tabiuri xalişen çkvaneri aksioniş om3ikanu ren.
İnk’ip’azoba, dido çkvaneri fakt’orepete na yeçkindun p’roblemi rennati am fakt’orepeş didope k’ai tabieturi ren. Namtini xalepes ink’ip’azoba, dorinuş k’ont’rolişi xap’i, erk’inaşi ç’ami, ant’idepresani, 3’k’uni mak’vate ç’ami, aluminiumi do k’alsiumoni ant’iasit’i k’uç’işi ç’amepe, ginz’e oraloni laksat’ifiş oxmaruş sebebite yeçkindun. Am ç’amepeş hekimiş tavsiyete oktiru varna uoşumute p’roblemi diçoden. İnk’ip’azobaş p’roblemi na omç’unan oxorcapeş didope, xampa lifoni oç’k’omalepe nizamuri ç’k’omanşi, dğaluri 3’k’ariş oşumu munz’inanşi do dğaluri mk’ule goxtimu steri perpu egzersizepeş oxvenus oxvamç’k’anşi am p’roblemişen muçitunan.
Na iç’k’omen oç’k’omalepe oxazmuşi k’analiş morgvalis imkven do ipaşen, antepeş doloxe xuras na uk’ors maddepe di3xiris ant’alen do lifi coxoni dido na var ipaşu şeni di3xiris na var ant’alu, xura şeni na var uk’ors varna zarari na meçaps maddepe, oxazmuşi k’analiş mçxu mç’uşi burmeşa muitken. Mçxu mç’uşa na nunç’uşun am maddepeş 3’k’arepe k’ismen di3xirişa ant’alen do mçxu mç’us naqonaşi k’undi coxoni genomskidepeşa nikten. K’undi, mçxu mç’uşi çodinas ok’uibğen do malumi oraş k’ule oz’guşi reflek’sik k’oçis oz’gu noç’iraps do am genomskidepe oz’gute xuraşen komoçodaps.
Oz’guşi xaceti ginz’e oras var itehirinasunon. K’oçepeşi didopes oç’k’omuş k’ule do bilasa ç’umaneri oç’k’omuşen tak’ribi 30 deik’eş k’ule oz’gu geacinen. Nizamuri egzersiziş oxvenu mçxu mç’uş aksionepeş nizamuri oqopinus dido becitoba uğun. Lifoni oç’k’omalepeş oç’k’omu do 3’k’ari oşumuş monz’inu, k’undiş oçiçkanu do oz’guş refleksiş manişa oqopinu şeni dido beciti ren. Mç’uş dek’oderi ç’amepe oşvelus ixmaren. Amuşeni p’icişen na işven solusionepe, t’abletepe k’ala rekt’umuri lavmanepe itatbik’en. Mara bilasa esasi am xali na yoçkindaps sebebiş oşvelu uk’ors.
|
TÜRKÇE
