DUDBUT'K'A

YEMŞKURNACE MELİ

Meli, Canidae (coğoryari) familiaş doloxe şkvit cinsi na uğun do tak’ribi 24 ç’eşidi na uğun şuronepeşi oşkari coxo ren. Vulpes vulpes yani mç’ita meli ren Canidae familiaşi irişen dido na iz’iren ç’eşidi. Mç’ita melis 75 sant’imi ginz’enoba (+40 sant’imi k’udeli), 40 sant’imi t’ani do 7- 9 k’ilo monk’anoba uğun. Jin muşi mç’ita, tude muşi xçe do t’rik’epe muşişi tudenk’ele uça iqven. Ciniki mutepeşi uça ğareli varna mtelo bresti do uça melepesti moixvaden. Mç’ita meli Avrop’a, Asia, olande Afrik’a do olande Amerik’a steri dido mçire dixapes skidun. Bilasa mt’k’apes, noğapeş gale, qonapes oskedinu k’ai u3’onunan mara noğapeşi xolos edo xolo noğapeşi doloxe umosi dido mç’ita meli iz’iren. Mç’ita melik noğapeşi t’oroci, ç’uk’i, mtugi do m3kvit’uraşi nak’onoba ok’ont’rolaps do aşote k’oçepes nak’aen.

Mç’ita melepek oç’opuşa seris gamulunan. Motali muşis oç’opu na oguraps 3’una melepeşen gale melepek oç’opu şeni ekseri xvala gulunan. Manişa geak’ibinan do ekseri mxvat’urape oxre3kinapan. Çkvaneri ç’it’a skindinape, mzgudaluri oç’k’omalepe do xro3kerepe ç’k’omupan. Tudele ogvaconi k’vinçepe, kotumepe, m3kvit’urape, bombolape, çxomepeti ç’k’omupan. Nadiren mskveri varna ğecişi motalepeti ç’opupan do dido naç’iranşi amfibiumi do masursepeşi ç’eşidepeti ç’k’omupan. Melepeşi okotumaleşen kotumeş noxiru dido çinaperi ren. Namtini melepek şarapes naqonopan do ot’omobilepeş zeri skindinapeşi leşepeti ç’k’omupan.

Mç’ita melepek 3’anaşi dido ora xvala goloçkumernan. Oşka Avrop’as 3’anağani-K’unduraş tutape, omjore Avrop’as Xrist’ana-3’anağaniş tutape melepeşi omz’ik’uş orape ren. Am orapes kimoli melik 3’unas nastern do emuk’ala imzik’en. Kimolik 3’unas elodgitun do motalepeş oçvus nuşvels. 50 dğaloni omçinobaş k’ule 3- 5 motali dibaden. Motalepes maartani jur dolonis tolis var az’irenan do 4- 6 doloniş morgvalis buz’i 3’u3’onupan. Ar tutaş k’ule mağaraşen kogamulunan. Egere 3’una meli armutxa sebebişen doxro3kuna kimoli melis motalepes xvalati a3’k’omilen. Motalepek otxo doloniş k’ule nana mutepeşişen ok’ui3’k’enan do 10 tutaş k’ule ok’omzik’uşi koniktenan. Ar 3’aneri iqvanşi nana mutepeşi naşkumernan. 12 3’ana k’onari askedinenan. Tabiuri duşmanepe muşi ren vaşak’i, mgeri, puxu do ar3’ivi.



                                                                                                                                                              TÜRKÇE