DUDBUT'K'A

OŞVANUŞİ REFLEKSİ OXVALU

Oxvalu, oşvanuşi zabunobapes irişen dido z’ireli nişanepeşen arteri ren. Oşvanuşi gzalepaşa amaxtimeri xark’i cismepe varna doloxe yeçkinderi bronşişi 3’arape, balğami, di3xiri steri patologiuri maddepe gamat’k’oçu şeni refleksi yado yeçkindun. Oxvalu 3’oxlenuro xunç’k’uli, oşvanuşi purengi do bronşepeşi ar na3’ilişen yeçkindun. Şiddetoni ar oşvanute xunç’k’ulişi onk’iluşa nargeri xonarişi telepeş o3’in3’uşen yeçkindun. Ubaşi adalepeş ok’o3’in3’us korbaşi adalepekti noqonops. Oşvanuşi purengiş tazyik’işi omağaluk xunç’k’uli gon3’k’imuşa noç’iraps do meç’ireli xunç’k’uliş xonarişi telepeş otirtinu t’ip’iuri oxvalus gza meçaps.

Zaturre steri purpuşi zabunobas balğami bronşepeşa var nunç’uşuşaşa oxvalu var yeçkindun. Purpuşi zarişi zabunobapes nop’rani oxvalu iqven. Oşvanuşi gzalepes mtini ar zabunoba va rt’aşiti histeri do st’resişen yeçkinderi xuçeluri oxvalu iz’iren. İrişen beciti jur t’ip’i (xomula do balğamoni) oxvalu ren mara antepeşen çkva namtini xususi şeklepesti yeçkindun:

Xomula oxvalu: Oxvaluşi xonari arxvala xonarişi telepeş otirtinute yeçkindun. Zabunis balğami var nat’k’oçinen. Am t’ip’i oxvalu ekseri balğami yoçkindinaps xunç’k’uli, oşvanuşi purengi do bronşişi iltihabepes do plorezi steri purpuşi zarişi zabunobapes iz’iren. Nok’vate oxvaluti xomula oxvaluşi ar ç’eşidi ren do çixot’k’aşi geç’k’alaş p’eriodis iz’iren.

Balğamoni oxvalu: Xonarişi telepeşi o3’in3’ute yeçkinderi xonarişa balğamişi no3’ilepeş oşvanuşi gzalepeş morgvalis oxonk’anute yeçkinderi xonariti elam3xven. Çkvaneri miktarepes iqvastina balğami iroras iqven mara zabuni ç’it’a bere, didi 3’aneri dm. oqopinu steri xalepes oxvalute var gamiğinen, k’uç’işa geişkvinen.

Nobeturi oxvalu: Meqoneri do şiddetoni oxvalupeşen 3’opxun do k’ut’ali do şamat’oni oşvanute nik’vaten. T’ip’iuro k’ok’i3’as iz’iren mara bronşişi muk’oza iziyanaşi varna oşvanuşi gzalepeşa xark’i cismepe imt’aşiti yeçkindun.

Olalu steri oxvalu: Zabunişi xonari dork’ineri iqven. Larenjiti, difteri dm. zabunobapeşen yeçkinderi xonarişi telepeş iltihabis, ekseriti ç’it’a berepeşi ak’ut’i xunç’k’uli-oşvanuşi purengi-bronşepeşi iltihabis iz’iren.

Jur tononi oxvalu: Çkvaneri tononi jur xonarişi ok’oxtimute yeçkindun. Xonarepeşen arti xunç’k’ulis xonarişi telepes majura umosi tude, oşvanuşi purengi do bronşepes iqven.

Tapala xonaroni oxvalu: Mağala xonaroni oxvalu va ren mara dido noç’irapaps. Xunç’k’ulis tumori varna ç’ixot’k’a steri xonarişi telepeşi monk’a lezyonepes iz’iren.

Oxvalu namu zabunobaşen yeçkinduna emuşa moxva oşvelu unon. Xomula oxvalu, havaşi pintoba varna z’igara steri otahrişuşi sebebepe yeç’k’odaşi diçoden. K’aixeşa hava amiçkvinaşi do hava it’enapinaşi didote oxvalu im3ikanen. İnfek’sioni iğodinuna oxvalus, ant’ibiot’ik’epete oşvelu unon. İnfek’sionepeşen yeçkinderi oxvalupe, necasetepe purpus var ok’oibğas yado var nik’vaten edo nimxvacinen.