DUDBUT'K'A

P'ROFESORİ SEYYİD KUTUB

P’rofesori Seyyid Kutubi, Misiruli maç’are, mufesiri do gamantanerie. 1906 3’anas Misirişi k’asaba Asyutis dibadu, namut dindari art ocaxişi bere. Oşkadogurale do lise El-Ezheris oçodinu. Kahireşi Universit’eşi Darul Ulum Fak’ult’eşa amaxtu. 1933 3’anas fak’ult’eşen mezuni iqu do artneri 3’anas mamgurapalobaşa itayinu. 1939 3’anaşk’ule İslamuri simadaşa itemayilu. 1946-s p’ozisionişi dersepe coxoni mak’ale muşi kogamoçkvu. Mak’ale muşis, K’uranik cemiet’işi islahi do amuşeni Muslimanepeşi oxandu geçinadumersya zop’ont’u do Misirişi emdğaneri cemiet’uri xali do omç’ut’u dejenerasioni tenk’idup’t’u.

1949 3’anas AOO-şa mendaxtu. Ham devreş morgvalis Amerik’uri skidala do cemiet’i, Amerik’uri rasizmi tenk’idu do Amerik’uri noğaroba p’rimit’ifi şinu do rediqu. 1949 3’anas, Amerik’as rt’uşi, İslamis Cemiet’uri Adalet’i coxoni noç’are muşi gamiçkvinu. Ham noç’ares mtini cemiet’uri adalet’i Muslimanobas ren yado idiaqu. Svarape muşis, ekseri ananuri İslami vardo mtini İslami mudafaqu. Tasavufişi xurafepe tenk’idu. Misirişa uk’uniktuşi, mamgurapaloba naşkvu do teşkilati Muslimani cumalepeşa ak’atu. Teşkilatişi gazeta do jurnalepes umeç’k’vidu simadape muşi ç’arupt’uşi, teşkilatişi umumi simada do muşi simadapes namtine çkvanerobape yeçkindu nati, teşkilati Muslimani cumalepe k’ala oirtibatus naqonu.

Cemal Abdulnasirişa 1954 3’anas suik’ast’i oğodinuşi sebebite Muslimani cumalepeşi dido mak’ature steri Seyyid Kutubiti konoç’opes. Muxakemeşi çodinas Seyyid Kutubişa vitoxut 3’ana molaxunuşi ceza niçinu. Molaxunales, K’uranişi tefsiri Fi-zilalil K’urani do siaset’uri do simaduri fik’irepe muşi Şaraşi Nişanepe coxoni svaras ç’aru. 1964-s oxişkvinu do uk’ule 1965-s xolo tevkifinu. 22 Mariaşina 1966-s go3’ok’idinuşi ceza niçinu. Seyyid Kutubi 29 Mariaşina 1967-s go3’ik’idinu. Omtinaleşi heyetik go3’ok’idinuşi ceza meçuşi Kutubik haşo tkveret’u: “Egere Ellaşi k’anonite hukmi momçaptna Ellaşi hukmişa razi vore. Egere beyhude k’anonite hukmi momçaptna emuşen umosi k’ai art simada miğun şeni m3udelapeşa do munafik’epeşa var vaxve3’ep. Ellaşa dido şukuri voğodap, vitoxut 3’ana cihadi pxveni do ham mertebeşa mevunç’uşi. Ellaşi şara şeni xveneri dulyape şeni p’ot’e var gixat’irupt. Nemazis Ellaşi artobaşa şahidoba xveneri k’iti çkimik, tağutişi hukmi tasdik’u şeni art boncati p’ot’e var ç’arasunon.”

Noç’arepe muşi: Fi-Zilalil K’urani (10 cildi), İslamuri Simadaşi Umdepe-Esasepe (3 cildi), Şaraşi Nişanepe, İslamis Cemiet’uri Adalet’i, Dini Hayae, Moxtanora İslamişie, Oxorca do Ocaxi, İslami do Emp’erializmi, İslami do K’ap’italizmişi K’abğa.



                                                                                                                                                              TÜRKÇE