|
PİR SULTAN ABDAL
Pir Sultan Abdali, 16. oş3’anuras skidineri xalk’uri şairi ren. Alevi cemietişi mordineri irişen didi guramepeşen do şkviti 3’k’onda Alevi şairişen arteri ren. Mtini coxo muşi ren Haydari. Sulale muşi Yemenuri ren do ekşen Hoyişa moxtimeri, Anatoliaşa uçvate Sivasişi ilçe Yildizelişi bucaği Çirçirişi oput’e Banazişa dobargeri renya itkven. 16. oş3’anuras Osmanalişi oxen3ales eçkindineri dido yedgitas numxvaceren do cemieturi yedgitape temaloni şiirepe ç’areren.
Pir Sultan Abdali, Alevuri ananepe k’ala dergaxis gamintanu. Osmanalişi cemieti monk’a oktaluri tatbik’epete iç’qip’en do emuşeni ağani oktala dvaç’irs yado şiirepe muşis moçkva molaşineren. Dudi temape muşi renan; notkvamepe, nok’itxupe, Ellaşi qoropa, Ehli Beytişi qoropa, duazimami, ğormoturi qoropa, tasavufi do cemieturi ikazi. Hayati (Şax İsmail), K’ul Xuseyini do K’ul Himmetişen itesirineren. Şiirepe muşis mağeri do sade art nena ixmaru. Tekke do tasavufişi hududi mojilu do xalk’işi didopes nuxonaru. Bilvasita art dervişot cemietis mtini gza o3’iru. Erbilis medresuri gurapa iguru nati majura xalk’uri şairepe steri divanuri ç’aralobaşen çkar var itesirinu.
Osmanalişi oxen3alek xalk’işen p’at’ixeşa xarcepe go3’umert’u do unaxondinoni dulyape oğodapt’u namut Pir Sultan Abdali skidut’u 1500-oni 3’anapes. Am meç’irapeşi çodinas xalk’ik yedgitut’u do tie3’azdipt’u. Pir Sultan Abdali, aşo monk’a şart’epeşi devres Anatolia muk’i-muk’i goxtu do muxalifi oxonk’ana omordinu do xalk’is zulumişa edgitinu şeni uç’andu. Pir Sultanişi irişen didi p’rop’agandaş malzeme rt’u, Alevuri dokt’rinişi musavoba do ok’ortinu temaloni şiirepe muşi. Pir Sultan Abdalis, Alevuri dokt’rini k’aixeşa kuçkit’u. Am çkina şiirepe muşis ixmart’u, art ‘gzaşi’ k’oçi steri ocerape muşi otatbik’apt’u. Pir Sultan Abdalik, muç’o rt’as nati mağdurobaşa, imp’erializmişa, zalimişi zulmişa nodgituşi umdepes konumxvacu. Çodinasti Osmanalişi Sivasiş Bebegeşbegi Deli Xizir Paşaş k’elen go3’ik’idinu do umdepe muşi şeni dişehidinu. 1547-1551 vana 1587-1590 3’anapeşi şkas ğuru yado itahminen.
|
TÜRKÇE
