|
MAZLUMİ NENA KURDURİ
Kurduri nena, Hindu-Avrop’a nenaluri ocaxişi Hindu-İranuri xanç’alişi olandegeulva İranuri grup’iş doloxe ren. Turkiaşi yulva do omjoreyulvaş k’ele, Suriaşi olandeş k’ele, İrak’işi olande do yulvaş k’ele do İranişi geulvaş k’ele iğarğalen. Arabuli, Turkuli do Farsuliş k’ule Oşkeyulvaşi maotxani nena ren, namut irişen dido iğarğalen. Kurduri nena m3ika rt’as nati; Armenias, Okortules, Turkmenistanis, Lubnanis, Afganistanis, Rusiasti iğarğalen.
Kurduri nenas, hemi nenaçkina hemiti namtine temeli zit’apeşi xususis Avesti do Sank’riti steri mcveşi nenape, Frengiuri, İnglisuri, Rusuli do Germanuri steri moderni Avrop’uri nenape k’ala beciti mengapobape uğun. Artneri cincişen eçkindineri Kurduri k’ala Farsuli mengapoba do çkvanerobapeti Latinurişen mraleri Frengiuri, İt’aliuri do Esp’aniuri nenapeşi çkvanerobape steri ren. Namtine zit’apes mcveşi İranuri nenaş cinci uğun mara oraş doloxe iktireren do jur çkvaneri telafuzişa konikteren. Farsuli do Kurduri nenapes muşeburi xampa zit’aluri xaznepe, morfologia, fonologia do grameruli k’aidepe kuğunan. Mesela Kurduri nenaşi beciti roloni coxopeşi, Frengiuri nenas uğun steri kimoluri do oxorcaluri tefrik’i Farsuli nenas var uğun.
Mevcudi ç’areli delilepeşi tolite Kurduri nena; Aramuri do Yunanuri albonepete, Masi Sorati albonite, Yezidi Kurdepeşi albonite, Arabuli cinconi Kurduri albonite do Latinuri bonconi Kurduri albonite iç’arineren. Andğas ixmarinen Latinuri cinconi Kurduri albonis 31 bonca (8 xonaroni, 23 uxonare) uğun. Kurduri ç’aralobas, xalk’uri ç’araloba do meç’areli ç’araloba yado jur burme uğun. Xalk’uri ç’araloba, tak’ribi şilya 3’anuri meç’areli ç’aralobaşen umosi mcveşi ren. Hemadani Baba Tahirik (935-1010), Kurduri ç’aralobaşi maartani misali, şilya 3’anaş 3’oxle İranis Arabuli albonite ç’areren. Kurmanci ren Kurduri nenaşi edeburi svarape ç’areli beciti dialekt’i. Kurmanci dialekt’ite 15. oş3’anuras meç’areli namtine edeburi svarape andğaşa konunç’uşeren. Kurmanci dialekt’ite maç’are Kurdi şairepe namit iptineri goişinenpe renan; Eliye Heriri (1425-1495), Feqiye Teyran (1590-1660), Melaye Ciziri (1570-1640) do Ahmed-i Hani (1650-1707).
|
TÜRKÇE
