|
COXO MUŞİŞ MAGORE GEOGRAFİA
Magazete, maç’are İbrahim Sediyaniş k’elen xazireli “Coxo Muşiş Magore Geografia” coxoni svara, gamaçkumale Ozedonuşiş k’elen St’aroşina 2009 tarixis St’amp’olis gamiçkvinu. Gamaçkvaşi maktaloba Cuneyt Turhanik, k’ilifişi dizaini do mizanp’aji Faruk Mağatik xvenu. Am svara, 3’anapeşi meqoneri golva do goşogorapeş k’ule ixaziru. Maç’arek goşogorape muşi Avrop’asti noqonaps do “asimilasioniş p’olit’ik’apeşi” kianaşi tatbik’epe goşogoru do şilyadoşilya misalite kianaşi asimilasioni gamognapu. Svaraşi doloxe; yulva do omjoreyulva Anatoliaşi oput’epeşi Kurduri coxope, Uçazuğaş oput’epeşi Lazuri do Kortuli coxope, doloxe Anatoliaşi Kurduri oput’epe, Turkiaşi Ç’erk’ezuri oput’epe, coxo mutepeşi ktireli dixapeşi Kurduri, Lazuri, Zazauri, Kortuli, Armenuri, Urumuli, Arabuli, Ç’erk’ezuri mcveşi do mtini coxope meşaç’ars.
Coxope, nenaşa, ç’araşa do skidalaşa matire timsalepe renan namut otemsileri manape. Namtine coxopekti oşkari ç’k’ua do tasavurişi xonarepeşen do boncapeşen şveri manaluri matirepe renan. Coxope; ocerapeşi, k’ult’urapeşi, kianuri simadapeşi maemanete renan. Birapapeşi, şiirepeşi, mgarapeşi oxo3’onapa; oşumu do oxeluşi oncire renan. Emuşeni ot’orit’eri rejimepek iptinerot coxope oktirapan. Coxope iktiraşi “xasi muşiti” iktirasunon yado coxope, zit’ape do nenape inoğirapan. Dobargalepeşi coxope iktirinaşi “ç’k’uapeti” iktirasunon yado meşvenan. Asimilasioniş p’olit’ik’apeşi irişen tesironi metodepeşen arteri nenapeşi do zit’apeşi oktirue. Asimilasioni, k’ult’uruli ok’otesiru va ren. Oraşi doloxe ixor3oleri tabieturi ktiralati va ren. Asimilasioni guroni ok’abulu do otasvibuti va ren. Asimilasioni, xalk’epe t’otaliteri metodepete “gonoktiru” vana sofistik’e metodepete oxark’u tkvala ren. Asimilasionişi p’olit’ik’apek oxoşkveri irade do goşo3xunuşi oxoşkva vardo, cebiri do meç’iru esasi ezdipan.
Kianak do Turkiak asimilasioni irişen p’at’işi, irişen umeç’vuşi xalepe koz’ires. Oşdooşi nena dimemnu/goiç’k’ondinu/goç’k’ondinuşa konişkvinu. Şilyadoşilya dobargalepeşi coxope ağanuri do sunuri coxopete iktirinu. Hukumranepek arxvala armia mutepeşite var; emp’oze xveneri k’ult’ura, mebaz’geri nena do zit’a mutepeşiteti xalk’epes gvak’irenan. “Coxo Muşiş Magore Geografia” beciti art xandae, globaluri do lok’aluri gvak’iruşi monoçkinde taxribati/taxrifati oxo3’onapu şeni. Svaras gez’in, kianas coxo muşi ktireli dobargalepe k’ala Turkiaşi 40 noğa, 368 ilçe do 7.526 oput’eşi asimilasionuri çkinape. Am svara manaluri xanda yado meç’aruşi ren, geografiapeşi mcveşi coxope xe muşişen muxtu konari ok’ok’orobu şeni.
Numçinuşi nomera: 0212 597 21 64
|
TÜRKÇE
