|
LAZİSTANİŞİ OPUT'EPE GOŞABĞERİ REN
Lazistanis diddudoni ma3xovaroba, Turketişi doloxe eşo Jilentuna-yulva Anatoliaşi T’erit’oria, Marmaraşi T’erit’oria varna T’rak’iaşi T’erit’oria steri va rt'asnati xolo dido mç'ipaşaşi sva okaçapt'u. Lazistanişi oput'epeşi mtelxolo oxorepes didopete didi dudoni 3xovarepe aqvet'es. Muşeni do, 1955-1960 3'anapeşakis Lazistanis çaişi agrik'ult'ura va iqopinet'u do xolo txirişi agrik'ult'urati eşo dido va rt'u. 3'oxleni orapes an3'ineri orapeşakis umosi dido oqopinot lazut'işi qonape do çkva xilepeşi dixape iqvet'u Lazistanis. Do xolo pucepeşi oncvinuşi dixape dido aqvet'es Lazistanişi oput'arepes. Çaişi agrik'ult'uraş gyoç'k'amute am qonapeşi didopek do xolo ont'ulepeşi didopek çaişi ont'ulepeşa kagiktiru. Pucepeşi oncvinuşi do tipepeşi ok'vatuşi dido dixape va doskidu do mapxaşi t'aronepes golapeşa mendaxtimuşi k'ult'urati dido va doskidu.
Lazistanişi oput'epes dido k'oçepe va doskidu, muç'o eşo Lazurişi ğuraş medginoba steri Lazistanişi oput'arepes na uqonunt'es dido k'ult'ura mutepeşiti ğura medgineri ren, mesela k'a3axurişi oxvenu do ç'eşidi ç'eşidi p'ekmezepeş oxvenu steri.
Lazistanis çaişi agrik'ult'uraş gyoç'k'amute k’oçepeşi ek’onomiuri dodgimoba mutepeşik m3ika kagiktiru, mara so3ialuri k'ult'ura mutepeşen dido na mendaxtu k'ult'ura mutepeşi dvaqves, mesela noğapeşa mendaxtimu varna Turketişi didi met’rop’olepeşa mendaxtimu namtini sebebepeten. Lazistanişi oput'epek k'arta ndğas m3ika-m3ika kamuiçoden, didopete badepe varna xçinepe doskidunan, ağanmordalepek va nik'ardapan didopete.
Oput'e mutepeşis çaişi magverdepe dido moxtes do entepeşi namtinepekti let'ape kaeç'opes Lazistanişi oput'arepeşen. So3ialuri balan3iape kok'ixu namtini Lazistanişi oput'epes. Çai o3'iluşi mitiksani na va uqonun, varna didope muşi texis na elaskides k'erapeşi bekim maana uqonut'es dixa mutepeşi magverdepeş meçamu varnatina gamaçamu, mara mu do dido int’eresoni ren do Lazistanişi doloxe na skidun do çai o3'liuşi bere-bari na uqonun mara dixa mutepeşi aşo mitxanepes na gamaçes Lazepeti iqu, hemti dixaşi yeç'opinu şeni na ak'vandu mzaxali mutepeşis dixa va gamaçes do çkva xalk'işi k’oçepeşa dixa na gamaçu Lazepeti iqu. Mu int’eresoni ren do, eşo k’oçepek muşi dobadona gamaçapt’es mtiniburot.
Albat, an3'ineri orapes mitiksanis mitişi ç'k'ua va dvaç'irs ya itkvalen. Mtelixolo k'oçişi oğodoba dudi muşişi 3’opxups, Ğormotik çkini şeni mu na ren na irişen xeironi emuşi oz'iramuşi menceli do çkina komomo3'iran. (Amin)
|
TÜRKÇE
