DUDBUT'K'A

FİLİSTİNİŞİ OXOŞKVAŞİ TEŞKİLATİ

Filistinişi Oxoşkvaşi Teşkilatişi (FOT) (Munazzamat al-Tahrir al-Filistiniya) temeli, 13-16 3’anağani 1964-s K’ahires ok’oxtimeri Arabuli Ok’oxtalas geit’k’oçu. 29 Pukrik’a 1964-s Filistinişi Mileturi K’onseişi ok’oxtimuş k’ule 2 Mbulora 1964-s Filistinişi Oxoşkvaşi Teşkilati geidginu. Teşkilati Arabuli oxen3alepeşi şkas go3’oncğonerobaşi limaş sebebite Filistinurepeş k’elen vardo bilasa Misirişi dudcumxuri Cemal Abdulnasirişi omxvacute geidginu. FOT-şi oteşkilatuş oras Arabuli oxen3alepek Filistinurepe mucadeleşa oxaziru şeni askeruli doguralepeşa amiqones, edoxolo teşkilatişi finansmani şeni Filistinişi Mileturi Foni 3’opxes. Arabuli oxen3alepes FOT-şi ofisepe guin3’k’u do em orapes Gazze do Sina dibargasunt’u Filistinişi Oxoşkvaşi Armia geidginu. Filistiniş davaşi siaseturi matemsile do Filistinuri dido teşkilatiş mak’orobe FOT-k, 1967 Arabi-İsraelişi limas aktivit’e muşi monz’inu. 1968 3’anas xveneri Filistinişi Mileturi K’onseişi maotxani ok’oxtalas FOT-k ağanuri iteşkilu. Silaxoni grup’epe mak’ature niç’arinu, akt’i ağanuri iç’arinu do Filistinişi Oxoşkvaş Armiaşi askeruli xanç’ali geidginu.

FOT-şi irişen beciti organi Filistinişi meclisişa muadili Mileturi K’onseie. Mak’aturepe, k’onseişi mevcudi heyeti, askeruli grup’epe, Filistinişi ok’oxtimalepe, meslek’uri teşkilatepe do umçane Filistinurepeşi simadapete goşi3xunen. K’onsei, FOT-şi siaseti do p’rogrami 3’opxups irişen mağala heyetie. FOT-şi tude ok’obğeri grup’epeş doloxe irişen didi teşkilati El-Fetihişi go3’oncğoneri Yaser Arafati, 1969' 3’anas FOT-şi İcra Heyetişi Dudmaxvence iqu. Arafatik 1973 3’anaşen doni dip’lomasiuri temasepete FOT-şa uçvaşi hukumetiş sifati mogapu. 1974 3’anas teşkilati, Arabuli Artoba, İslamuri K’onferansişi Teşkilati (İK’T) do Ok’oxtimeri Miletepeş (OM) k’elen Filistinurepeşi arteri meşru matemsile yado ik’abulinu. 1980-oni 3’anapeşi geç’k’aşakis FOT-iş doloxe dido çkvaneri grup’i rt’u nati Filistinişi davaşi 3’oxleni teşkilati yado içinu. Teşkilatişi şkaguri 1967 3’anaşi limaş k’ule Urdunişa, 1970 3’anas Lubnanişa do 1982 3’anas İsraelik Lubnanis xegedvuşi Tunusişa iğinu.

FOT-şi dudmaxvence Arafatik, Xrist’ana 1988-s FOT-şi coxote t’erorizmi oncğore pşinapt yado ğarğalu. Aşo tkuşi AOO-s am gamognapa El-Fetih, Menceli 17, Grup’i Havari, Filistinişi Xalk’uri Oxoşkvaşi Cepe (FXOC) do Filistinişi Demok’rat’iuri Xalk’uri Oxoşkvaşi Cepe (FDXOC) steri teşkilatepekti aşo ismadepanya a3’onu. Mara AOO k’ala FOT-şi dialogi FXOC-k 30 Pukrik’a 1990-s İsraelişi zuğap’icişa nat’k’va3uşi kok’uixu. 1994 3’anas xveneri Gazze-Erihaşi akt’i do St’aroşina 1995-s xveneri II. Osloşi akt’ite İsraelik Gazzeşi zuğap’icişi xolosi irsoti, geulva Şeriaşi namtini k’ortapeşi xe3ala Filistinişi ot’orit’eşa konaşku. 1996 3’anaşi 3’anağani tutas xveneri goşo3xunaşi çodinas 88 mak’aturoni Filistinişi Ot’orit’eşi K’onsei i3’opxinu. Edoxolo goşo3xunaşi çodinas Arafatik, Filistinişi Ot’orit’eşi dudmaxvence yado vazifeşa kogeoç’k’u. Filistinişi Ot’orit’eşi k’abines 23 naziroba uğut’u mara beciti k’arari eç’opuşi selahieti Arafatişi xes rt’u. Edoxolo hukumetis beciti p’ozisionepe El-Fetihişi mak’aturepeşa niçinu. FOT-s, andğanerdğas mevcudi xali muşite Filistinişi Mileturi Ot’orit’eşi maktale p’olit’iuri art p’art’i steri fonksioni uğun.