|
NAGAZİ GİQONUN NA, NARĞİ VAR GİĞUN
“Nagazi” coxoni K’avk’asuri Mç’k’eşuri coğorik K’avk’asias na skidun unik’aluri coğorepeşen ar ç’eşidi ren. Okorturas jur ç’eşidi Kavk’asuri mç’k’eşuri coğori iz’iren. Entepeşen Kazbeguri coxoni na ren coğoris mk’ule bundğa uğun do emuşeni am coğorik “Kyose” coxo muşitenti içinen. Majurani ç’eşidi coğori ginz’e bundğ’oni ren do “Nagazi” coxo muşiten dido çinoperi ren. K’avk’asuri mç’k’eşuri coğorik dido mcveşi p’eriodepeşen doni Okorturas na skidunan çkineburepeşi megabre muşi ren. Edo muk oput’uri xalk’işi irişen k’ap’et’i dost’i ren. K’avk’asuri mç’k’eşi coğorepes, Okorturas na skidunan çkineburepeşi ist’orias dido mskva do beciti monk’anoba uğunan. K’avk’asuri mç’k’eşi coğoris ar çkva coxoti uğun, eti “Tarti” ren.
Çinoberi ist’orik’osi Sulxan Saba Orbelianik am coğori şeni aşo ç’arups:”Am ç’eşidi coğori mçxuri do dixaşi oçumalu şeni dido didi coğori ren. “Nagazi” coxoti “Gazi” do “Dagazuli” coxopeşen ezdimeri ren do registra3ia muşi xveneri ren. Coxos registra3iabulişi asti uğun. K’avk’asuri mç’k’eşuri coğori gigant’uri ren do emus p’eci bundğape uğun. Bundğape muşik qini do tu3a orapesti eya çumers . Am coğorişi maartani sakvari muşik mance muşişa, yani mç’k’eşişa megabroba oxvenu ren. Oçumaluşi gagnapa muşi dido mağali ren. Edo balan3iuri xura uğun. Dost’i na var renpes agreziuli iqven do mance muşis do entepeşi megabrepes sadik’oba o3’iraps. Coğorik dido gurami ren. Entepek p’artik’ulurot berepe qoropan. Dido mcveşi orapes nana do babapek berepe mutepeşi am coğorope amanaturot naşkumert’es do dido mendralapes na ren qonapes oxanduşeni ulurt’es. Edo moxtaşi, berepe mutepeşi şurgedgineri z’iropt’es.
Na z’iropt steri entepe dido sadik’uri megabrepe rt’es. Mancepe mutepeşik çkva K’avk’asiuri coğorepes na oğ’odes steri, entepeşi qucepeti elak’vatupt’es. Emuşi sababi cansağoba mutepeşi şeni ren. Emuşeni ki, k’abğis mt’erepe muşik quci mutepeşi var aç’opan yado. Mara entepeşi k’udelepe var ik’vaten. K’udeli muşi coğorişi k’arizma muşiş semboli ren. Jin na yulun morgvali k’udeli muşi, coğorişi ti-mo3’onoba do k’ap’et’oba muşi çkvalepes o3’iraps. Jur 3’aneri 3’una coğori arçkva nana işinen. Jurşuronobaşi p’eriodi 58 ndğaşen 63 ndğaşakis naqonen. Ar 3’anas jur fara dorinaps do ar faras artişen 16 şakis motala adorinen. K’avk’asiuri mçk’eşuri coğorepek dido p’at’i ndğ’alepeti z’ires. Edo majurani kianuri ok’ok’idinuşk’ule 1950-oni 3’anapes K’avk’asiuri mçk’eşuri coğori eç’opes do çkva terepeşa mendiqones. K’linik’epes dido p’at’i xalepeti z’ires.
|
TÜRKÇE
